Almatyda Mega Alma-Ata ortalyǵynyń tóbesine qaǵylǵan gıpsokartonnyń fragmenti qulady
ALMATY. QazAqparat - Búgin Almatyda nóser jaýynnyń saldarynan Mega Alma-Ata saýda oıyn-saýyq ortalyǵynyń tóbesine qaǵylǵan gıpsokartonnyń synyǵy edenge qulady. Bul týraly jańa ǵana Mega Center Management kommýnıkatsııa departamentinen habarlady.
«Búgin Almatyda kúndizgi saǵat 13:20-da MEGA-2-niń tóbesinen gıpsokartonnyń bir synyǵy edenge qulady. Oǵan sý aǵatyn qubyrdyń jarylýy sebep boldy. Qazir oqıǵa ornynda jóndeý jumystary júrgizilip jatyr. Zardap shekkender joq», - delingen departamenttiń habarlamasynda.
Aıta ketelik, buǵan deıin nóser jaýynnyń saldarynan ál-Farabı dańǵylyn sý basqandyǵy jáne Esentaı Moll kesheni tusyndaǵy jerasty ótkeliniń sýǵa tolǵandyǵy týraly habarlanǵan bolatyn.
