Almatyda medqyzmetkerlerge ústemeaqy tóleý úshin 5,5 mlrd teńge bólindi
ALMATY. QazAqparat – Almaty qalasynda koronavırýs epıdemııasyna qarsy sharalarǵa 9 mıllıard teńgege jýyq qarjy bólingen. Onyń 5,5 mıllıard teńgeden astamy koronavırýsqa qarsy kúresip jatqan densaýlyq saqtaý nysandary qyzmetkerleriniń jalaqysyna qosymsha ústemeaqy retinde qarastyrylǵan. Bul týraly «Áleýmettik medıtsınalyq saqtandyrý qory» KEAQ Almaty qalalyq fılıaly málim etti, dep habarlaıdy QazAqparat tilshisi.
Qordyń habarlaýynsha, vırýsqa qarsy kúreske jumyldyrylǵan medıtsına nysandarynyń tizimin Almaty ákimdigindegi arnaıy komıssııa bekitken. Tizimge sáıkes, sáýir aıy úshin medıtsına mamandaryna tólenetin ústemaqy 1,5 mıllıard teńgeni qurady.
«Maýsymnyń birindegi málimet boıynsha, almatylyq 5398 medıtsına qyzmetkeriniń jalaqysyna qosymsha aqy retinde 1,5 mıllıard teńge tólendi. Qazirgi tańda qalada epıdemııaǵa qarsy is-sharalarǵa 86 densaýlyq saqtaý nysany jumyldyrylǵan. Esterińizge sala ketsek, qosymsha tólemder densaýlyq saqtaý salasy qyzmetkeriniń ómirine tóndiretin qaýip deńgeıine qaraı tólenedi» , - dedi ÁMSQ Almaty fılıaly basshysy Tileýhan Ábildaev.
