Almatyda medqyzmetkerlerge ústemeaqy tóleý úshin 1 mlrd teńgeden asa qarajat bólindi
ALMATY. QazAqparat - Almatyda koronavırýspen kúresip jatqan medıtsına qyzmetkerlerine ústemeaqy tóleý úshin 1 mlrd teńgeden asa qarajat bólindi. Bul týraly «Áleýmettik medıtsınalyq saqtandyrý» qorynyń Almatydaǵy bólimshesiniń basshysy Nurlybek Qabdyqaparov aıtty, dep habarlaıdy QazAqparat tilshisi.
Bólimshe dırektorynyń aıtýynsha, qazir ústemeaqy alatyn mamandardyń tizimi jazylyp jatyr.
«Búginde bizdiń medıtsına qyzmetkerlerine ońaı emes. Olar óz densaýlyqtaryn qaterge tigip, qyzmet kórsetip jatyr. Prezıdenttiń tapsyrmasymen memlekettik bıýdjetten materıaldy kómek retinde 212 myń teńgeden 850 myń teńge arasynda qarajat qarastyrylyp jatyr. Qor qarjylyq operator retinde bul aqshany medıtsınalyq uıymdarǵa aýdaratyn bolady», - dedi Nurlybek Qabdyqaparov.
Qalalyq Qoǵamdyq densaýlyqty saqtaý basqarmasynyń buıryǵyna sáıkes 2020 jyldyń naýryzynda Almatyda 15 densaýlyq saqtaý uıymy tirkelgen.
Ústemeaqy osy uıymdarda isteıtin 3557 adamǵa (502 dáriger, 1742 orta medpersonal, 549 kishi medpersonal, 764 basqa da qyzmetkerge) tólenedi.
Búginde 13 uıymnyń qyzmetkerine qarajat jiberildi. Olardyń arasynda I.Jekenova atyndaǵy ınfektsııalyq aýrýhana, Balalar juqpaly aýrýlar aýrýhanasy, Jedel járdem medıtsınalyq qyzmeti bar.
Tólemder 3 kúrdelilik sanaty boıynsha júrgiziledi. Birinshi topqa COVID-19 koronavırýsy bar patsıentterge medıtsınalyq kómek kórsetý úshin anyqtalǵan reanımatsııa bólimsheleri men basqa da statsıonarlardy qosa alǵanda, ınfektsııalyq statsıonarlardyń dárigerleri, orta jáne kishi medıtsına qyzmetkerleri jatqyzylǵan.
Bul qyzmetkerlerge tólenetin ústemeaqy mólsheri respýblıkalyq bıýdjet týraly zańda bıylǵy qarjy jylyna belgilengen aılyq jalaqynyń jıyrma eselengen eń tómengi mólsherinen aspaıdy.
Ekinshi topqa provızorlyq statsıonarlardyń dárigerleri, orta jáne kishi medıtsına qyzmetkerleri, jedel medıtsınalyq kómektiń dárigerleri men feldsherleri, onyń ishinde ambýlatorııalyq-emhanalyq uıymdar, sondaı-aq tartylǵan jaǵdaıda sanıtarlyq avıatsııanyń dárigerleri men orta medıtsına qyzmetkerleri jatqyzylǵan.
Bul toptaǵy qyzmetkerlerge tólenetin ústemeaqy mólsheri respýblıkalyq bıýdjet týraly zańda bıylǵy qarjy jylyna belgilengen aılyq jalaqynyń on eselengen eń tómengi mólsherinen aspaıdy.
Úshinshi topqa karantındik statsıonarlardyń dárigerleri, orta jáne kishi medıtsına qyzmetkerleri, medıtsınalyq jedel járdem brıgadalarynyń júrgizýshileri, sondaı-aq zerthanalardyń mamandary, epıdemııaǵa qarsy is-sharalardy júrgizýge tikeleı qatysatyn sanıtarııalyq-epıdemıologııalyq qyzmet jumyskerleri, jiti respıratorlyq vırýstyq ınfektsııalary, pnevmonııasy bar patsıentterdi qabyldaýǵa jáne epıdemııaǵa qarsy is-sharalarǵa baılanysty bıologııalyq materıaldy alýǵa aıqyndalǵan shuǵyl statsıonarlardyń qabyldaý bólimsheleriniń jáne medıtsınalyq-sanıtarııalyq alǵashqy kómek uıymdarynyń qyzmetkerleri, Tótenshe jaǵdaı jónindegi jedel shtabtyń jáne oblystar, respýblıkalyq mańyzy bar qalalar men astana ákimdikteriniń aýmaqtyq shtabtarynyń músheleri, sondaı-aq blokbeketterde karantındik rejımdi qamtamasyz etetin densaýlyq saqtaý qyzmetkerleri jatady.
Eske sala keteıik, QR Prezıdenti Qasym-Jomart Toqaev dárigerlerdi qarjylaı qoldaýdyń jańa paketi týraly aıtqan edi.
Keshe alǵashqy tólemder aýdaryla bastaǵanyn jazǵan bolatynbyz.
Sondaı-aq, Almatydaǵy balalar juqpaly aýrýlar aýrýhanasynyń qabyldaý bóliminiń dárigerleri ústemeaqyǵa qatysty shaǵym túsirgen bolatyn.
QR DSM basshysy Eljan Birtanov dárigerlerge ústemeaqyny qaıta eseptep tóleýdi buıyrǵan edi.
