Almatyda medıtsınalyq jabdyqtar satyp alýǵa 27 mlrd teńge bólindi
ALMATY. QazAqparat - Megapolıs ákimi Baqytjan Saǵyntaev «Almaty» telearnasyndaǵy tikeleı efırde medıtsınalyq kómektiń sapasy men qoljetimdiligin arttyrý mindetteriniń qalaı sheshilip jatqanyn aıtty, dep habarlaıdy QazAqparat tilshisi.
Baqytjan Saǵyntaevtyń aıtýynsha, qala turǵyndaryn qoljetimdi jáne sapaly medıtsınalyq qyzmettermen qamtamasyz etý – Almaty ákimdiginiń basty mindetteriniń biri. Osyǵan oraı qalalyq densaýlyq saqtaý júıesi tereń jańarýdan ótip jatyr. Pandemııa óz rólin oınady, bul megapolıstiń densaýlyq saqtaý júıesin nyǵaıtý jumystaryn jedeldetýge májbúr etti. Infraqurylymdy salý, materıaldyq-tehnıkalyq bazany nyǵaıtý, medıtsına qyzmetkerleriniń biliktiligin arttyrý máseleleri sheshilýde.
«Byltyr densaýlyq saqtaýdyń 5 nysany paıdalanýǵa berildi. Atap aıtqanda, sáýir aıynda paıdalanýǵa berilgen Alataý aýdanyndaǵy 280 tósek-oryndy modýldi aýrýhana. Qazan aıynda Naýryzbaı aýdanynda 300 tósek-oryndy jańa modýldi ınfektsııalyq statsıonar paıdalanýǵa berildi. Jeltoqsan aıynda Túrksib aýdanynda 500 tósek-oryndy jańa ınfektsııalyq statsıonar iske qosyldy»,- dedi ákim.
Medıtsınalyq uıymdardyń materıaldyq-tehnıkalyq jabdyqtalýyn jaqsartý úshin 2020 jyly jergilikti bıýdjetten 43,1 mlrd teńge bólindi. Aýrýhanalar men emhanalar úshin 11 myńnan astam birliktegi medıtsınalyq jabdyqtar satyp alyndy, reanımatsııa bólimderi 100% jabdyqtaldy.
Dıagnostıkalyq qyzmettiń sapasyn arttyrý úshin qala statsıonarlaryna 4 KT jáne bir MRT apparattary satyp alyndy. Jedel járdem qyzmeti úshin zamanaýı reanımatsııalyq qurylǵylarmen jabdyqtalǵan 135 arnaıy kólik satyp alyndy.
Modernızatsııalaýdyń úsh jyldyq baǵdarlamasyna sáıkes barlyq medıtsınalyq uıymdardyń materıaldyq-tehnıkalyq bazalary nyǵaıtylýda. Bıyl medıtsınalyq jabdyqtar satyp alýǵa jergilikti bıýdjetten 27 mlrd teńge kóleminde ekinshi transh bólindi.
Emhanalardy medıtsınalyq ottegimen qamtamasyz etýdiń qalalyq baǵdarlamasy qabyldandy. Qaladaǵy 16 aýrýhananyń barlyǵy ottegi stantsııasymen, sonymen qatar vakýýmdyq jáne kompressorlyq júıelermen jabdyqtalǵan.
Infektsııalyq qaýipsizdikti qamtamasyz etý maqsatynda medıtsınalyq qaldyqtardy joıý baǵdarlamasy qabyldandy, onyń aıasynda qalanyń ınfektsııalyq aýrýhanalarynda qaýipti medıtsınalyq qaldyqtardy joıýǵa arnalǵan 11 qondyrǵy salyndy. Sondaı-aq, osy maqsatta bıyl ınfektsııalyq aýrýhanalardyń aǵyndy sýlaryn zalalsyzdandyrý baǵdarlamasy júzege asyrylady.
Baqytjan Saǵyntaevtyń aıtýynsha, «qadamdyq qoljetimdilik» qaǵıdaty boıynsha medıtsınalyq qyzmettermen qamtamasyz etý jalǵasýda. Osyǵan baılanysty ambýlatorııalyq-emhanalyq uıymdar salý josparlary túzetildi.
Bıyl 9 otbasylyq -dárigerlik ambýlatorııa men 3 emhana salý, sondaı-aq 4 densaýlyq saqtaý nysanyn seısmıkalyq nyǵaıtý josparda.
Qalanyń shetki aýdandarynda qymbat klınıkalyq-dıagnostıkalyq qyzmetterdiń qoljetimdiligin qamtamasyz etý úshin tórt modýldik KT ortalyǵyn salý josparlanǵan.
Jalpy, 2020-2024 jyldarǵa arnalǵan «Jańa Almaty» keshendi damý jospary aıasynda densaýlyq saqtaýdyń 28 nysanyn salý jáne rekonstrýktsııalaý josparlanýda, qazir 18 nysannyń jobalyq-smetalyq qujattary ázirlenýde.
Olardyń barlyǵy zamanaýı qondyrǵylarmen jabdyqtalady, al jumys medıtsınalyq kómek kórsetýdiń zamanaýı talaptaryna saı júretin bolady.
