Almatyda medıtsınalyq uıymdarǵa 200 mln teńge aıyppul salyndy
ALMATY. QazAqparat – Almatyda bıylǵy jartyjyldyqta sapasyz medıtsınalyq qyzmet kórsetken densaýlyq uıymdaryna 200 mln teńgege aıyppul salyndy, dep habarlaıdy QazAqparat tilshisi.
Almaty qalasy ákiminiń orynbasary Erjan Babaqumarov «Áleýmettik medıtsınalyq saqtandyrý qory» KEAQ basqarma tóraǵasynyń orynbasary Lázzat Aqtaevamen megapolıs halqyn mindetti áleýmettik medıtsınalyq saqtandyrý (MÁMS) júıesimen qamtýdyń mańyzdy máseleleri boıynsha óńirlik shtabtyń onlaın otyrysyn ótkizdi.
Otyrysqa ÁMSQ Almaty fılıalynyń basshylyǵy, qalalyq qoǵamdyq densaýlyq saqtaý, áleýmettik ál-aýqat, kásipkerlik jáne ınvestıtsııalar basqarmalary, óńirlik kásipkerler palatasy, sonymen birge memlekettik jáne jekemenshik medıtsınalyq mekemelerdiń bas dárigerleri qatysty.
Erjan Babaqumarov jumys berýshiler men iri, orta jáne shaǵyn bıznes sýbektileriniń, sonymen birge joǵary jáne orta bilim berý oryndarynyń, halyqtyń jeńildik jasalatyn sanatynyń málimetterin ońtaılandyrý qajettigine nazar aýdardy.
Almaty qalasy boıynsha «Áleýmettik medıtsınalyq saqtandyrý qory» KEAQ fılıalynyń dırektory T.Ábildaev aǵymdaǵy jyly bıýdjet 1,6 ese óskenin jáne 197,6 mlrd teńgeni quraǵanyn aıtty. Onyń ishinde COVID-19 kúres aıasynda, epıdemııaǵa qarsy sharalarǵa 12,5 mlrd teńge bólindi. Naýryzdan shildege deıingi aralyqta 27 265 medıtsına qyzmetkerine jalpy somasy 8,9 mlrd teńgege ústemeaqy tólendi.
Búginde Almaty qalasynda 154 medıtsınalyq uıym MÁMS júıesi aıasynda qyzmet kórsetýde, onyń ishinde 62 paıyzy memlekettik menshik formasynda bolsa, 38 paıyzy jekemenshik ıelikte. Kórsetiletin medıtsınalyq qyzmet sapasyna turaqty túrde monıtorıng júrgiziledi. 2020 jyldyń birinshi jarty jylynda kórsetilgen qyzmetterdiń sapasy men kólemi boıynsha 4 myńnan astam buzýshylyq anyqtalǵan, medıtsınalyq uıymdarǵa salynǵan aıyppuldar 200 mln teńgeden asty.
Otyrys barysynda medıtsınalyq uıymdardyń bas dárigerleriniń MÁMS aıasynda halyqqa medıtsınalyq kómek kórsetý týraly baıandamalary tyńdaldy.
Óńirlik shtabtyń tóraǵasy, Almaty qalasy ákiminiń orynbasary Erjan Babaqumarov halyqty MÁMS aıasynda halyqty qamtýdyń keńeıtý qala turǵyndarynyń sapaly medıtsınalyq qyzmet alý quqyǵymen qamtamasyz etýge qajet ekenin atap ótti jáne basqarmalar men medıtsınalyq uıymdardyń basshylaryna atalǵan suraqty erekshe baqylaýǵa alýdy tapsyrdy.
Mindetti áleýmettik medıtsınalyq saqtandyrý júıesi halyqqa medıtsınalyq qyzmet túrleriniń keńeıtilgen paketin, sonyń ishinde qymbat turatyn protsedýralar men operatsııalardy kepildendirilgen tegin medıtsınalyq kómek kólemimen shektelmeı kórsetýge múmkindik beredi.
