Almatyda medıtsınalyq saqtandyrylǵan azamattarǵa dıagnostıkalyq qyzmetter tegin kórsetiledi
Dárigerdiń aıtýynsha, salalyq mamannyń qabyldaýyna emhanadaǵy jalpy praktıka dárigeri arqyly jazylýǵa bolady. Odan keıin patsıenttiń densaýlyq jaǵdaıyna qaraı profıldik mamanǵa joldama beriledi.
«Salalyq mamandardyń konsýltatsııasy, KT, MRT, rentgen, taǵy da basqa dıagnostıkalyq qyzmetter saqtandyrylǵan azamattarǵa mindetti medıtsınalyq saqtandyrý arqyly kórsetiledi. Ol úshin emdeýshi dárigerdiń joldamasy qajet. Dáriger joldamany tıisti kórsetilimder men aýrý belgilerine qaraı jazyp beredi», - dedi Nazgúl Imanǵalıeva.
Aıta keterligi, qajetti qyzmet túri emhanada kórsetilmese, patsıentke basqa emdeý mekemesine joldama berilýi tıis. Qyzmet medıtsına uıymdary arasyndaǵy qosymsha kelisimshart negizinde kórsetiledi.
«Shuǵyl jaǵdaıda medıtsınalyq kómek keshiktirilmeýi tıis. Eger emhana qyzmet kórsetýden orynsyz bas tartsa, klınıka janyndaǵy patsıentterdi qoldaý qyzmetine habarlasyp, máseleni sol jerde sheshýge bolady», - dedi spıker.
Onyń aıtýynsha, ýchaskelik dárigerdiń joldamasyn qajet etpeıtin jaǵdaılar da bolady.
«Mysaly, salalyq maman qoıǵan dıagnozdy naqtylaý maqsatynda qosymsha ınstrýmentaldyq tekserý júrgizý, shuǵyl stomatologııalyq kómek qajet bolsa, tirkelgen emhanadaǵy akýsherdiń nemese pısholog mamannyń qabyldaýyna kirýge, dermatovenorologııalyq syrqattardy emdeý úshin joldama alýdyń qajeti joq. Mundaı jaǵdaılarda atalǵan qyzmetterdi kórsetetin klınıkanyń tirkeý bólimine jazylsa jetkilikti», - dedi qalalyq densaýlyq saqtaý basqarmasy basshysynyń orynbasary mindetin atqarýshy Nazgúl Imanǵalıeva.
