Almatyda medıtsınalyq saqtandyrý júıesin túsindirý boıynsha naýqannyń aralyq qorytyndylary aıtyldy
Aıta keteıik, 2015 jyly 16 qarashada «Bes ınstıtýtsıonaldyq reformany júzege asyrýdaǵy 100 naqty qadam» Ult josparyn júzege asyrý aıasynda Memleket basshysy Nursultan Nazarbaev «Mindetti áleýmettik medıtsınalyq saqtandyrý týraly» QR Zańyna qol qoıdy.
Mindetti áleýmettik medıtsınalyq saqtandyrýdy engizý týraly Ult josparynyń 80-shi qadamynda kórsetilgen. Bul qujatta Qazaqstanda memleket, jumys berýshi jáne árbir adamnyń jaýapkershiligine negizdelgen halyqaralyq tájirıbege súıene otyryp, medıtsınalyq saqtandyrý júıesin engizý qarastyrylǵan. Sonymen qatar, memleket halyqtyń belsendi emes toby úshin ekonomıkalyq jarnalar bóledi. Jumys berýshiler - jaldanbaly jumyskerlerdiń tarapynda. Salyq organdarynda tirkelgen jumyskerler men ózin-ózi qamtamasyz etetin azamattar - ózderi úshin jumys jasaıdy. Sondaı-aq, memleket azamattardy kepildi tegin medıtsınalyq kómek kólemimen (KTMKK) qamtamasyz etedi: áleýmettik mańyzdy aýrýlar úshin medıtsınalyq kómek kórsetý, tótenshe jaǵdaılarda, jedel-járdemde, sanıtarlyq avıatsııa jáne vaktsınatsııada. Almaty qalalyq densaýlyq saqtaý basqarmasynyń málimeti boıynsha, jalpylama densaýlyq saqtaý quqyǵyn qorǵaýdy qamtamasyz etý maqsatynda 2020 jylǵa deıin KTMKK aıasynda saqtandyrylmaǵan azamattarǵa ambýlatorlyq dári-dármek berýmen qatar ambýlatorlyq-emhanalyq kómek kórsetiledi. QR Áleýmettik qorǵaý jáne damý mınıstrligi Medıtsınalyq qyzmetti tóleý komıtetiniń Almaty qalalyq departamenti basshysy Tileýhan Ábildaevtyń aıtýynsha, 2016 jyldyń 13 qazanynan 10 qarashasyna deıin segiz aýdanda 3612 turǵyn qatysqan 43 kezdesý ótken. Sonyń ishinde 846 - jumysshy, 134 - medıtsınalyq qyzmetker, 957 - bıýdjet mamany, 67 - qoǵamdyq keńesi men kásipodaq, 213 - kásipker, 5 - ózin-ózi jumyspen qamtýshy, 1320 - zeınetker, jumyssyzdar qatysqan. Onyń aıtýynsha, ózin-ózi jumyspen qamtýshy qazaqstandyqtar alǵashqy jyly medıtsınalyq saqtandyrýǵa tómengi jalaqy mólsheri boıynsha 457 teńge tóleı alady. «Eger ózin-ózi jumyspen qamtýshy turǵyndar óz mártebesin anyqtaı almasa, ózin-ózi saqtandyra almaıdy. Memleket ortasha jalaqy deńgeıine múmkindik berýde. Olar úshin 457 teńge tóleý qatty qıyndyq týǵyzbaıdy dep oılaımyn. 2020 jyly kiristerdiń jalpylama deklaratsııasy qabyldanyp, salyq júıesi kimniń qansha tabatynyn anyqtaı alady. Sonda 2020 jyly óz mártebelerin anyqtap, medıtsınalyq saqtandyrý júıesine qatysý mindetteledi», - dedi T. Ábildaev.
Aıta ketý kerek, memlekettik jarnalar mólsherlemesi azamattardyń erekshe sanaty úshin ortasha aılyq jalaqy kóleminiń 7% quraıdy. Sondaı-aq, mólsherleme kólemi kezeńimen qosylyp otyrady: 2018 jyly 4%, 2019 jyly 5%, 2023 jyly 6%, 2024 jyly 7% quraıdy. Almaty qalalyq densaýlyq saqtaý basqarmasynyń basshysy Ýálıhan Ahmetovtiń aıtýynsha, kásiporynnyń qyzmetin qadaǵalaıtyn baqylaý keńesteri qurylǵan. Barlyq damý josparlary, medıtsınalyq uıymnyń esepteri baqylaý keńesinen ótip, saıttarda jarııalanady.
«Qalalyq bıýdjetten dárigerlerdiń biliktiligin arttyrýǵa, medbıkelerdiń mamandyqtary boıynsha jetildirýlerine 200 mln teńgeden astam qarjy bólindi. Buǵan qosa, biz aýdandyq ákimdikterde, qoǵamdyq keńesterde jumystar júrgizip, Kásipkerler palatasyndaǵy kásipkerlermen kezdestik. QazUMÝ, tóleý komıtetimen birlesip, kásipkerler men salyq tóleýshiler arasynda atalmysh jumystardy atqarýdamyz. Bizdiń jumysymyz Zańnyń júzege asý merzimi boıynsha túpkilikti sheshim qabyldanǵanda jáne tólemder men medıtsınalyq qyzmetter júıesi iske qosylǵanǵa deıin jalǵasady», - dedi Ýálıhan Ahmetov.
