Almatyda medıtsınalyq kómekke bólinetin qarajat bir jarym esege artady
NUR-SULTAN. QazAqparat - Áleýmettik medıtsınalyq saqtandyrý qorynyń ınfraqurylymdary 2020 jyly halyqqa kórsetiletin qyzmetterdi satyp alýǵa tolyǵymen daıyn.
Qor medıtsınalyq saqtandyrý salasyndaǵy ozyq tájirıbelerdi qoldanysqa engizip, júıeni damytý jumystaryn aldaǵy ýaqytta da toqtatpaıdy. Bul týraly Almatyda medıtsınalyq saqtandyrý máseleleri jónindegi aımaqtyq shtab otyrysynda «Áleýmettik medıtsınalyq saqtandyrý qory» KEAQ basqarma tóraǵasy Aıbatyr Jumaǵulov málimdedi.
Qor basshysy aldaǵy jyly Almatyda medıtsınalyq kómekke bólinetin qarajat bir jarym esege artatynyn alǵa tartty.
«Naqtyraq aıtqanda, 2019 jyly qala turǵyndaryna memlekettik tapsyrys sheńberinde kórsetiletin tegin medıtsınalyq kómekke 114,9 mlrd teńge bólingen bolsa, kelesi jyly bul soma 160,4 mlrd teńgege jetpek», - dep atap ótti A. Jumaǵulov.
MSQ tóraǵasynyń sózine súıensek, bul medıtsınalyq saqtandyrý júıesiniń engizilýimen tyǵyz baılanysty.
Birer aıdan keıin tolyq iske qosylatyn reformanyń negizgi maqsaty medıtsınalyq qyzmettiń sapasy men qoljetimdiligin arttyrý bolǵandyqtan reformany aqparattyq-túsindirý jumystaryna jiti kóńil bólinip otyr. Osyǵan baılanysty Almaty ákimdigi turǵyndar arasynda aqparattandyrý jumystaryn kúsheıtý jóninde naqty tapsyrmalar berdi.
«Reforma qarsańynda qala turǵyndarynyń MÁMS jaıly bilý deńgeıin kóterýimiz qajet. Ásirese, bıresmı jumys isteıtin azamattardyń mártebesin anyqtaýdyń mańyzy zor. Sol sebepti ár turǵynǵa durys málimet berý, sondaı-aq, týyndaǵan suraqtarǵa tolyqqandy jaýap berý reformanyń tabysty júzege asyrylýyna septigin tıgizedi», - dedi Almaty ákiminiń orynbasary Erjan Babaqumarov.
Sonymen qatar, Medıtsınalyq saqtandyrý qory jýyq arada jeke baılanys ortalyǵyn iske qospaq. 1406 biryńǵaı baılanys ortalyǵy sarapshylary halyqqa medıtsınalyq kómek pen saqtandyrý jarnasyna qatysty jan-jaqty málimet berip, jurtshylyqtan túsken aryz-shaǵymdarmen aınalysady.
Esterińizge sala ketsek, «Áleýmettik medıtsınalyq saqtandyrý qory» KEAQ kepildendirilgen tegin medıtsınalyq kómek pen áleýmettik medıtsınalyq saqtandyrý júıesi sheńberinde kórsetiletin qyzmetterdiń qarjy operatory bolyp tabylady.
