Almatyda medıtsına salasyndaǵy úzdikter anyqtaldy
ALMATY. QazAqparat - Almatyda Medıtsına qyzmetkerleri kúnine arnaıy uıymdastyrylǵan keshte úzdik dárigerler marapattaldy, dep habarlaıdy QazAqparat tilshisi.
Jıynǵa qala ákimi B.Baıbek, QR Densaýlyq saqtaý vıtse-mınıstri Lázzat Aqtaeva, densaýlyq saqtaý salasynyń ardagerleri, ǵylymı-zertteý ınstıtýttary men ǵylymı ortalyqtardyń, respýblıkalyq medıtsınalyq mekemelerdiń basshylary, jekemenshik jáne qoǵamdyq uıymdardyń ókilderi qatysty.
«Aq halatty abzal jandarda eshqashan demalys pen meıram bolmaıdy.
Olardyń erligin baǵalaý kerek. «Almaty-2020» baǵdarlamasynyń negizi adamǵa qamqorlyq kórsetý ekeni belgili. 5 jylda qala bıýdjeti 60 mlrd teńgege ósti. Kóptegen kórsetkishter jaqsaryp keledi. Atap aıtqanda, ómir súrý uzaqtyǵy 76 jasqa jetti», - dedi Baýyrjan Baıbek.
Onyń aıtýynsha, byltyr 12 mlrd teńgege 9 medıtsınalyq mekeme salyndy. Olardyń altaýy bıyl paıdalanýǵa beriledi.
«Búginde Bostandyq aýdanynda zamanaýı zerthana ashyldy. Jańa qural-jabdyqtar almatylyq dárigerlerge dıagnozdy durys qoıýǵa kómektesedi», - dedi B.Baıbek.
Jıyn barysynda QRDensaýlyq saqtaý vıtse mınıstri Lázzat Aqtaeva almatylyq dárigerlerdiń jumysyna baǵa berdi.
«Júkti áıelderdiń 12% Almatyda bosanady. Aýrýhanaǵa jatqyzý kórsetkishi boıynsha 11% Almatyǵa keledi. Munda 13 myń dáriger, 18 orta medıtsınalyq qyzmetker jumys jasaıdy», - dedi Lázzát Aqtaeva.
2018 jyldyń úzdik medıtsına qyzmetkerleri arasynda ótkizilgen 10 atalym boıynsha qalalyq konkýrstyń jeńimpazdary anyqtaldy.
«Úzdik dáriger» atalymy boıynsha Qalalyq kardıologııalyq ortalyqtyń kardıohırýrgııa bólimshesiniń meńgerýshisi Nursan Sýrashev jeńimpaz atandy. Ol respýblıkalyq konkýrsta da jeńiske qol jetkizip, elimizdiń «Úzdik dárigeri» dep tanyldy.
«Úzdik meıirbıke» atalymynda №5 qalalyq klınıkalyq aýrýhananyń medbıkesi Nazıra Myrzabaeva jeńimpaz atanyp, respýblıkalyq konkýrsta da jeńiske qol jetkizip, elimizdiń «Úzdik medbıkesi» atandy.
«Úzdik provızor» atalymy boıynsha №7 qalalyq klınıkalyq aýrýhananyń dárihana meńgerýshisi Tatıana agalnıkova jeńimpaz atandy.
«Úzdik menedjer-densaýlyq saqtaý salasynyń uıymdastyrýshysy» atalymy boıynsha №1 qalalyq emhana bas dárigeriniń orynbasary Anastasıa Popova jeńimpaz atandy.
«Úzdik sanıtarııalyq-epıdemıologııalyq beıin dárigeri» Almaty qalasy boıynsha Qoǵamdyq densaýlyq qorǵaý departamentiniń qyzmetkeri
Darhan Sısenov jeńimpaz atandy.
«Úzdik táýelsiz sarapshy» atalymy boıynsha №5 Qalalyq klınıkalyq aýrýhana ishki aýdıt bóliminiń basshysy Maııa Bolshanova jeńimpaz atandy.
«Úzdik densaýlyq saqtaý salasynyń áleýmettik qyzmetkeri» atalymy boıynsha №5 qalalyq klınıkalyq aýrýhananyń áleýmettik qyzmetkeri Margarıta Asylbekova jeńimpaz atandy.
«Úzdik medıtsınalyq kolledj ustazy» marapatyna Almaty medıtsına kolledjiniń oqytýshysy Maıra Sarsenbaeva laıyq dep tanyldy.
«Úzdik feldsher» atalymy boıynsha №32 qalalyq emhananyń feldsheri Erkebulan Rysdáýletov jeńimpaz atandy.
«Úzdik sanıtarlyq- epıdemıologııalyq saraptama mamany» atalymy boıynsha Almaty qalasy Densaýlyq saqtaý basqarmasynyń bas maman-epıdemıology Elvıra Ibragımova jeńimpaz atandy.
Qala ákiminiń «Alǵys» hatymen 30 medıtsına qyzmetkeri, «Eńbek ardageri» medalimen 7 medıtsına qyzmetkeri, «QR densaýlyq saqtaý isine qosqan úlesi úshin» 15 medıtsına qyzmetkeri jáne «QR densaýlyq saqtaý isiniń úzdigi» tósbelgilerimen 15 medıtsına qyzmetkeri densaýlyq saqtaý salasyna eleýli úles qosqany úshin marapattaldy.
Araılym Joldasbaı
