Almatyda medıtsına qyzmetkerlerine vaktsına salýdyń ekinshi kezeńi bastaldy
ALMATY. QazAqparat- Almaty emhanalarynda SOVID-19-ǵa qarsy revaktsınatsııa bastaldy, dep habarlaıdy QazAqparat tilshisi.
Búgin Almatyǵa KVI-ǵa qarsy vaktsınanyń ekinshi partııasy 1750 doza jetkizildi.
Kovıdke qarsy preparatty tasymaldaý barlyq talapqa saı júrgizildi.
«Vaktsına 18 gradýstan tómen emes temperatýrada sýyq tizbekti saqtaý talaptaryna sáıkes temperatýralyq tirkeýshi ornatylǵan arnaıy avtokólikpen jetkizildi. Ortasha temperatýra 22-24 gradýsty qurady. Vaktsına birden ortalyqtandyrylǵan vaktsına qoımasynyń muzdatqyshyna salyndy», - dedi Almaty qalalyq ortalyq klınıkalyq aýrýhanasynyń epıdemıologııalyq qaýipsizdik jáne ınfektsııalyq baqylaýdy qamtamasyz etý jónindegi dırektordyń orynbasary Elvıra Ibragımova.
Qala ákimdiginiń málimetinshe, revaktsınatsııa 1750 adamǵa eseptelgen, ıaǵnı bul alǵashqy vaktsınany alǵan medıtsına qyzmetkerleri.
Naýryz aıynda ekinshi kezeń úshin taǵy 9 800 doza jetkiziledi. Sonymen qatar, ımmýndaýǵa tartylǵan emhanalar jelisi keńeıtiledi. Vaktsınalar kelip túskennen keıin óz erikterimen ótinish bildirgen medıtsınalyq qyzmetkerler ekpe ala bastaıdy.
№36 emhananyń bas dárigeri Gúljaınat Tilegen egý aldynda barlyq qyzmetkerler dárigerdiń tekserýinen ótetinin aıtty. Ekpeni alǵannan keıin 30 mınýt ishinde vaktsına saldyrǵandar jeke bólingen bólmede baqylaýda bolady.
«Búgin 65 medıtsına qyzmetkeri ekpe aldy. Vaktsınany alǵandardyń bári ózderin jaqsy sezinedi, eshqandaı janama áserler baıqalmaıdy. Qalǵan 95 adam erteń vaktsınatsııadan ótedi», - deıdi dáriger.
Onyń aıtýynsha,ekpe salynǵannan keıin profılaktıkalyq sharalar oryndalýy tıis. Ol áleýmettik qashyqtyq jáne betperde taǵý, al JRVI belgileri anyqtalǵan adamdar dárigerge barýy qajet.
Vaktsınany eń aldymen, ımmýnızatsııany juqpaly aýrýlar aýrýhanasynyń, jedel járdem kómeginiń, reanımatsııa, medıtsınalyq-sanıtarlyq alǵashqy kómek (MASK), qabyldaý bólimshesiniń, sanıtarlyq-epıdemıologııalyq qyzmettiń jumyskerleri alady.
Ekinshi satyda vaktsınamen jalpy bilim beretin mekteptiń, joǵary oqý oryndarynyń, birinshi satyǵa kirmegen medıtsınalyq qyzmet jumyskerlerin qamtıdy.
Úshinshi satyǵa mektep-ınternattyń, mektepke deıingi balalar mekemesiniń pedagogtary, stýdentter jáne sozylmaly aýrýmen aýratyn adamdar, áleýmettik-medıtsınalyq mekeme jumyskerleri jatady. Vaktsına alýǵa profılaktıkalyq ekpe kezinde qarsy kórsetkishteri bolǵan adamdarǵa ruqsat etilmeıdi.
Alǵashqy vaktsına 1 aqpannan 19 aqpanǵa deıin júrgizildi. Nusqaýlarǵa sáıkes ekinshi komponent túpkilikti ımmýnıtetti qalyptastyrý úshin 21 kúnnen keıin engizilýi kerek.
