Almatyda medıtsına qyzmetkerlerine 8,8 mlrd teńge ústemeaqy tólendi
ALMATY. QazAqparat – Almaty qalasynda koronavırýs epıdemııasyna qarsy kúres sharalaryna 9 mıllıard teńgege jýyq qarjy bólingen, dep habarlaıdy QazAqparat tilshisi.
«Densaýlyq saqtaý mınıstriniń buıryǵyna sáıkes aı saıyn naqty jumys istegen saǵattar boıynsha medıtsınalyq uıym qyzmetkerlerine qaýip toby boıynsha ústemeaqy tólenedi. Almaty qalasy boıynsha COVID-19 vırýsyna qarsy kúres aıasynda epıdemııaǵa qarsy is-sharalarǵa tartylǵan uıym qyzmetkerlerine naýryzdan bastap 8 mlrd 890 mln teńge tólendi»,– deıdi Almaty qalasy qoǵamdyq densaýlyq saqtaý basqarmasynyń basshysy Kamaljan Nadyrov.
Aı saıynǵy tólemder:
–Naýryz aıynda 3 766 medıtsına qyzmetkeri - 1 mlrd 262 mln teńge.
– Sáýir aıynda 5 474 medıtsına qyzmetkeri - 1 mlrd 511 mln teńge.
– Mamyr aıynda 5 043 medıtsına qyzmetkeri - 1 mlrd 518 mln teńge.
–Maýsym aıynda 5 432 medıtsına qyzmetkeri - 1 mlrd 805 mln teńge.
– Shilde aıynda 7 550 medıtsına qyzmetkeri - 2 mlrd 792 mln teńge.
«Sonymen qatar, birinshi táýekel tobynyń medıtsınalyq qyzmetkerleri jatyn orynmen, kúnine úsh márte tamaqpen jáne kólikpen qamtamasyz etildi. Eki myń medıtsına qyzmetkerine Almaty qalasynyń 18 qonaq úıinde bólme berildi»,– dedi ol.
