Almatyda Medıatorlar forýmy ótip jatyr
ALMATY. Qyrkúıektiń 21-i. QazAqparat /Erbol Azanbek/ -Búgin Almatyda ekikúndik medıatorlar forýmy bastaldy, dep habarlaıdy QazAqparat.
Sharany QR sýdıalar odaǵy, Taldyqorǵannyń «Kontakt» tutynýshylar quqyǵyn qorǵaý ortalyǵy, «Sana sezim» QU-y, Qazaqstannyń táýelsiz dırektorlary qaýymdastyǵy BUU-nyń «Qazaqstandaǵy ádil sot pen aqparattyq erkindigi men aıqyndylyǵy» atty baǵdarlamasynyń qoldaýymen uıymdastyrǵan.
Forýmǵa 60-qa jýyq medıator, sýdıalar men advokattar, ÚEU-dyń ókilderi qatysýda. Sharanyń basty maqsaty Qazaqstanda medıatsııa ınstıtýtynyń damýy, qyzyǵýshylyq bildirgen tulǵalardyń basyn qosý, qujattardy daıyndaý, mamandardy sertıfıkatsııalaý baǵytynda pikir almasý bolyp tabylady. BUU Damý baǵdarlamasynyń turaqty ókiliniń kómekshisi, Tıimdi basqarý departamentiniń jetekshisi Ekaterına Panıklovanyń aıtýynsha bul baǵyttaǵy alǵashqy konferentsııa Qazaqstanda 2000 jyly ótken bolatyn. «Ókinishke oraı bul túsinik keń taralyp otyrǵan joq. Kóbinese medıtsınadaǵy medıatatsııa termınimen shatastyrady. Bul qazaqta burynnan bar túsinik. Mysaly tórelik surap rýdyń aqsaqaldaryna júginý, qazirgi zamanǵy medıatsııaǵa uqsas» deıdi ol. Ulttyq tutynýshylar lıgasynyń prezıdenti Svetlana Romanskaıanyń aıtýynsha aldaǵy ýaqytta medıatsııany engizý baǵytynda birqatar sharýalar atqarylýy tıis. «Eń aldymen BAQ-yn osy taqyryppen tereńirek tanystyrý kerek. Búgingi shara sonyń bastamasy. Konferentsııa qorytyndysy boıynsha jasalǵan usynystar «QR Medıatsııa týraly» zańynyń tezirek qabyldanýyna septigin tıgizedi dep oılaımyn» deıdi ol.
