Almatyda «Medeý-Shymbulaq» kópiri qaıta jasaldy
ALMATY. QazAqparat - Almatyda qaıta jasalǵan «Medeý-Shymbulaq» kópiri paıdalanýǵa berildi, dep habarlaıdy QazAqparat tilshisi.
1982 jyly salynǵan kópir taý shańǵysy kýrorty men muz aıdyny arasyndaǵy avtokólik baılanysyn ustap turǵan edi.
«Kópir birneshe jyl boıy apatty jaǵdaıda boldy. Sol sebepti byltyr jeltoqsanda ýaqytsha kópir jasalyp, negizgi kópirde kúrdeli jóndeý bastalyp ketken edi. Tolyǵymen jol qaıta tóselip, astyndaǵy tirekteri aýystyryldy. Endi ýaqytsha kópir buzylyp, ornyna jańa kópir paıdalanýǵa berildi», - dedi qalalyq Jolaýshylar kóligi jáne avtomobıl joldary basqarmasynan.
Aıta ketý kerek, Shymbulaq taý shańǵysy kýrorty úshin bul kópirdiń strategııalyq mańyzy joǵary. Atalǵan kópir taý shańǵysy kýrortyna jetkizetin jalǵyz jol bolyp otyr.
Foto: old.onyxtour.kz
