Almatyda Medeý aýdanyndaǵy saıajaıǵa baratyn joldy laı kóshkini basyp qaldy
ALMATY. QazAqparat - Almatyda Medeý aýdanyndaǵy saıajaıǵa baratyn joldy laı kóshkini basyp qaldy. Bul týraly qalalyq TJD baspasóz hatshysy Sandýǵash Baımuhambetova habarlady.
«18-mamyrda tańǵy 08:35-te Medeý aýdanyndaǵy «Geolog» saıajaıyna baratyn jolda laı kóshkini oryn aldy. Joldy 50 tekshe metr tas pen laı aǵyny bitep tastady. Bul topyraqtyń shekten tys ylǵaldanýynan oryn aldy», - dedi S.Baımuhambetova.
Qazir kólikterdiń ótýine tyıym salyndy.
Sondaı-aq, Medeý aýdanynyń Jamaqaev kóshesinde tańǵy 10:00 shamasynda «Suńqar» shańǵy tramplıni kesheninde topyraqtyń shekten tys ylǵaldanýynan 20 tekshe metr sary topyraq kóshti. Tótenshe jaǵdaıdan eshkim japa shekken joq.
Aıta ketý kerek, sońǵy eki táýlikte Almatyda túsken jaýyn-shashyn mólsheri qalyptan kóp bolyp otyr.
Saldarynan qalanyń 5 aýdanyndaǵy 18 úıdiń aýlasyn sý basyp, aryqtar men saı-salaǵa sý toldy. Tipti metro stansasyn da sý aldy.
Tolassyz jaýǵan jańbyrdyń saldarynan taýly aımaqtarda kóshkin bolyp, Medeý-Shymbulaq joly buzyldy.
Aýa raıyn boljaýshylardyń aıtýynsha, jaqyn arada elimizdiń ońtústiginde kún jaýyndy bolady. Sondyqtan, tótenshe jaǵdaı rejimi saqtalady.
