Almatyda Medeý aýdanyna sý berildi

ALMATY. QazAqparat – Almatyda Medeý aýdanyn sýmen jabdyqtaý tolyǵymen qalpyna keltirildi, dep habarlaıdy QazAqparat tilshisi.

Almaty ákimdiginiń baspasóz qyzmetiniń málimeti boıynsha «Almaty Sý» derekteri negizinde 3 tamyz kúngi saǵat 11:00-degi jaǵdaı boıynsha Medeý aýdanynyń ońtústik bóligi sýmen jabdyqtaý tolyq qalpyna keltirildi. Buǵan taýly ózenderdegi sý deńgeıiniń turaqtanýy jáne sýdyń lastaný deńgeıiniń tómendeýi yqpal etti.

«Almaty Sý» MKK saǵat saıyn sýdyń sapasyna baqylaý júrgizedi. Zerthanalyq taldaýlar Kishi Almaty ózenindegi sýdyń laılaný kórsetkishteriniń tómendegenin kórsetedi, bul sýdy úzdiksiz alýdy júzege asyrýǵa jáne ony úılerge jetkizer aldynda odan ári tazartýǵa múmkindik berdi. Bastapqy ózen sýynyń sapasyna áser etetin qolaıly aýa raıy saqtalǵan jaǵdaıda sýmen jabdyqtaý úzilissiz júzege asyrylatyn bolady», - dep habarlady ákimdikte.
Ákimdiktiń málimetinshe, sý berýdi májbúrlep shekteýdiń bir sebebi – Medeý aýdanynyń joǵarǵy bóligi jer ústi sý kózderi aımaǵynda ornalasýy.
«Sondyqtan Almaty ákimi Erbolat Dosaev Medeý aýdanynyń joǵarǵy bóligin jer asty sýmen jabdyqtaý kózderine qosý boıynsha aýqymdy joba ázirleýdi tapsyrdy. Negizgi maqsat-taý bókteriniń turǵyndaryn taýly ózenderge tikeleı táýeldilikten aryltý. Osylaısha, joba aıasynda Medeý aýdanynyń ınjenerlik jelileri men obektileri qolda bar jerasty sý qoımalarynyń qýatyna qosymsha qosylatyn bolady. Budan basqa, Almatyda árqaısysy 3 myń tekshe metrge deıingi «Balqash» stantsııasynda 4 skvajına men rezervýardyń qurylysy júrgizilýde. Bul joba 20 myńǵa jýyq adam turatyn Kamenskoe plato, Kólsaı, Muztaý jáne ıÝbıleınyı shaǵyn aýdandarynyń turǵyndaryn sýmen qamtamasyz etýge múmkindik beredi», - delinedi ákimdiktiń habarlamasynda.
Eske salsaq, Almatyda jaýyn-shashynnyń saldarynan Medeý aýdany turǵyndary sýsyz qalǵan bolatyn.