Almatyda Májıt Begalınniń ómiri men shyǵarmashylyǵy jaıynda baıandaıtyn jańa derekti fılmniń tusaýkeseri ótedi
ALMATY. 21 aqpan. QazAqparat - Almatyda qazaq halqynyń asa kórnekti rejısseri, qazaq kınosynyń negizin qalaýshylardyń biri - Májıt Saparǵalıuly Begalınniń ómiri men shyǵarmashylyǵy týraly baıandaıtyn «Qaıratker» atty jańa derekti fılmniń
tusaýkeseri ótedi.
Fılmniń premerasy erteń, 22 aqpan kúni «Tsezar» kınoteatrynda saǵat 10.00-de bolady. Fılmdi shyǵarǵan - Sháken Aımanov atyndaǵy «Qazaqfılm» AQ-y.
Sondaı-aq, bul kúni fılmniń tusaýseker rásiminen keıin saǵat 12:30-da №120 mektepte (Qurmanǵazy kóshesi, Naýryzbaı kóshesiniń qıylysynda) Májıt Begalın atyndaǵy murajaıdyń ashylý saltanaty ótedi.
Merekeli is-sharalarǵa KSRO halyq artısi Asanáli Áshimov, QR halyq artısi Nurjuman Yqtymbaev, KSRO halyq ártisi Bıbigúl Tólegenova, Májıt Begalınniń aǵasy Qasym Saparǵalıuly Begalın, sonymen qatar rejısserdyń jaqyndary men týystary, kınostýdııa ókilderi men elimizdiń zııalylary qatysady.
Májıt Begalın "Bul Shuǵylada bolǵan edi", "Tulpardyń izi" kórkem fılmderi men Sh.Ýálıhanov týraly "Onyń kúni týady", B.Momyshuly jaıyndaǵy "Artymyzda Máskeý" fılmderin dúnıege ákelgen tulǵa. Ol Eńbek Qyzyl Tý, "Qurmet belgisi" ordenderimen marapattalǵan.
