Almatyda Májilistiń tuńǵysh tóraǵasy Marat Ospanovty eske alý keshi ótti
ALMATY. QazAqparat – Almatyda Abaı atyndaǵy opera jáne balet teatrynda memleket jáne qoǵam qaıratkeri Marat Ospanovtyń 70 jyldyǵyna arnalǵan eske alý keshi ótti, dep habarlaıdy QazAqparat tilshisi.
Marat Turdybekuly QR Parlamenti Májilisiniń tuńǵysh tóraǵasy boldy. Ol «Turaqtylyqtan ósýge» atty ekonomıkalyq baǵdarlamany jazdy, alǵashqy Salyq kodeksin, Qazaqstannyń táýelsizdigi týraly Deklaratsııany ázirleýge qatysty.
Keshte Marat Ospanov beınesine arnalǵan «Kodeks jıznı Marata Ospanova» qysqametrajdy derekti fılm kórsetildi.
Eske alý keshine qatysqan Almaty ákimi Baqytjan Saǵyntaev, Marat Turdybekulynyń aıryqsha saıası kóregendigin atap ótti.
«Qazaqstan Respýblıkasy Parlamenti Májilisine alǵashqy tóraǵalyq etken kezinde Marat Turdybekuly tereń bilimin kórsetti. Sol bir aýyr kezde elimizdiń sáýletti bolashaǵy úshin jańa zańdar qabyldaý óte mańyzdy edi. Marat Turdybekuly ómirsheń zańdardyń qabyldanýyna tikeleı jaýap berdi jáne olardy der kezinde júzege asyra bildi», — dedi Almaty ákimi Baqytjan Saǵyntaev.
Abaı atyndaǵy opera jáne balet teatrynyń sahnasynda №4 soqyrlar men nashar kóretin balalar mektep-ınternatynyń halyq aspaptary orkestri Serik Nurtazınniń dırıjerlik etýimen «Órleý» kúıin oryndady. «Qazaqstan daýysy» jobasynyń jeńimpazdary Dinmuhamed Dáýletov jáne Alena Kogaı І have nothing (Whitney Houston) ánin aıtty.
