Almatyda Májiliske depýtattyqqa 7 zeınetker men 6 jumyssyz úmitker bar

ALMATY. QazAqparat- Almatynyń úsh saılaý okrýginde Májilis depýtattaryn saılaýda joǵary básekelestik bolmaq. Bul týraly Óńirlik kommýnıkatsııalar qyzmetiniń alańynda ótken brıfıng barysynda Almaty qalalyq aýmaqtyq saılaý komıssııasynyń tóraǵasy Aıgúl Qalyqova aıtty, dep habaplaıdy QazAqparat tilshisi.

Spıkerdiń sózinshe, QR Parlamenti Májilisi depýtattyǵyna 2023 jylǵy 20 qańtar men 8 aqpan aralyǵynda Almaty qalasynan barlyǵy 143 kandıdat usynyldy.

«QR Parlamenti Májilisiniń depýtattyǵyna barlyǵy 104 kandıdat tirkeldi. 36 kandıdatty tirkeýden bas tartyldy. Negizgi sebepter: tıisti qujattardy usynbaý sondaı-aq kandıdattarǵa qoıylatyn talaptarǵa sáıkes kelmeýi. Al bir kandıdat Memlekettik kirister departamentinen deklaratsııa boıynsha óte almady. 2 adam kandıdatýrasyn keri qaıtaryp alý týraly ótinish berdi», - deıdi Aıgúl Qalyqova.

Aıtýynsha, okrýgter boıynsha eń joǵary básekelestik – № 3-shi okrýgte 37 adam. Tirkelgen úmitkerlerdiń 73-i er, 31-i áıel adam.

«Sondaı-aq tirkelgenderdiń 17-si bıýdjettik uıymdardyń qyzmetkerleri, kommertsııalyq qurylymdardyń qyzmetkerleriniń sany – 65 adam. 7 zeınetker, 6 jumyssyz jáne 2 adam qoǵamdyq uıymdardyń ókilderi, qoǵamdyq qorlar – 4, ózin-ózi jumyspen qamtyǵandar-3»,- dep atap ótti Almaty qalalyq aýmaqtyq saılaý komıssııasynyń tóraǵasy Aıgúl Qalyqova.

Sonymen qatar ol bir mandattyq okrýgter boıynsha Parlament Májilisine ózin - ózi usyný tártibimen tirkelgenderdiń qatarynda 91 adam bar ekeniniń jetkizdi.