Almatyda maýsym aıynda gazben júretin 200 jańa avtobýs jolǵa shyǵady
ALMATY. QazAqparat - Almatyda maýsym aıynda qala kóshelerine gazben júretin qosymsha 200 avtobýs shyǵatyn bolady, dep habarlaıdy QazAqparat tilshisi qalalyq mobıldilik basqarmasyna silteme jasap.
Barlyǵy bıyl 460-tan astam jańa avtobýs alý josparlanǵan.
«Syıymdylyǵy úlken jańa avtobýstar kondıtsıonerlermen, pandýstarmen jáne vıdeobaqylaý júıelerimen qamtylǵan. Jańa jyljymaly quram kólikti kútý ýaqytyn jáne baǵyttardaǵy keptelis saǵattaryn qysqartýǵa múmkindik beredi»,- dedi basqarmadan.
Aıta keterligi, qazirdiń ózinde «Almatyelektrotrans» JShS ornatqan kameralar arqyly júrgizýshiler baqylaýǵa alynǵan. Barlyq tártip buzýshylyq tártiptik keńeste qaralady.
«Ońaı» júıesi engizilgennen keıin qalanyń avtobýs parkteri 80%-ǵa jańardy, kóleńkeli aınalymdaǵy qarjy shyǵaryldy.
Eger buryndary avtoparkter bıýdjet qarjysy esebinen jańarsa, qazir tasymaldaýshylar óz qarjylaryn ınvestıtsııalaýǵa múmkindik beretin ashyq naryqtyq mehanızmdi utymdy qoldanýda. Jyl basynan beri qaraı №65, №60, №14 baǵyttar boıynsha 125 jańa avtobýs júre bastady.
Jalpy, Almatyda kólik reformasy aıasynda eki jyl ishinde ǵana qalanyń avtobýs parki 80%-dan astam deńgeıge jańardy. Elimizdegi alǵashqy BRT jelisi jumys isteı bastady, karsherıng qyzmeti engizildi, metronyń eki stansasynyń qurylysy jalǵasýda jáne LRT qolǵa alyndy.
Bulardan ózge, 15 sáýirden bastap qalada 120-dan astam kósheni ortasha jóndeý jumystary bastalady. Qalanyń 14 yqsham aýdanyndaǵy 456 kóshege jańa jol tóseledi. Jóndeý jumystary qoǵamdyq kóliktiń júrý kestesi men baǵyt qozǵalysyna keri áserin tıigzbeıdi. Keptelisti boldyrmaý maqsatynda jol tek tún mezgilinde ǵana jabylady.
