Almatyda «Máýlit» merekesine arnalǵan rýhanı kesh ótkiziledi

Qazaqstan musylmandary dinı basqarmasy baspasóz qyzmetiniń habarlaýynsha, bul is-sharany ótkizýdegi basty maqsat - jastardyń dinı kózqarasyn dástúrli dinimizdiń talaptarymen, ádet-ǵurpymyzdyń qundylyqtarymen, ulttyq bolmysymyzben ushtastyryp, ımandy, zııaly, zaıyrly, qoǵam qurýǵa úles qosý.

Sharaǵa Qazaqstan musylmandary dinı basqarmasynyń tórǵasy, Bas múftı Erjan qajy Malǵajyuly, Almaty qalasynyń ákimi Baýyrjan Báıbek, sondaı-aq zııaly qaýym ókilderi men din qyzmetkerleri qatysady dep kútilýde.

Merekelik sharada elge tanymal ánshiler rýhanı tálimdi ánder oryndap, óner juldyzdary taǵylymdy qoıylymdar kórsetedi. Sondyqtan aıtýly is-sharaǵa din men dástúrimizdiń janashyr azamattary - Bekjan Turys, Toqtar Serikov, Saıat Medeýov, Erkin Nurjanov syndy ánshiler men «Jigitter» kvarteti jáne «Óner qyrandary» teatry óner kórsetedi.

Aıta ketelik, Máýlit aıy - eki dúnıeniń sardary Paıǵambarymyz Muhammed (s.ǵ.s.) - nyń dúnıege kelgen aıy. Máýlit aıyn merekeleý arqyly Paıǵambarymyzdyń (s.ǵ.s.) ónegelerin bolashaq urpaqqa nasıhattap, Islam dininiń qadir-qasıetin túsindirýde mańyzy zor.