Almatyda matematıka páni muǵalimderiniń forýmy ótip jatyr

Forýmǵa bilim berý uıymdarynyń basshylary, ǵalymdar men úzdik muǵalimder, aýdandyq bilim bóliminiń basshylary, qalanyń barlyq mektepteriniń matematıka páni muǵalimderi qatysýda.

Basqosýda qala mektepterinde matematıkalyq bilimniń damýy men jaǵdaıy, matematıkany tereńdetip oqytý, matematıka páni men dıdaktıkalyq materıaldardyń mazmunyna qatysty suraqtar, matematıka páni muǵalimderiniń mártebesin kóterý, matematıkalyq bilim berý sapasyn arttyrý syndy máseleler talqylanýda.

«Birinshiden, Qazaqstannyń barlyq mektepterinde matematıka páni sabaǵynyń saǵatyn kóbeıtý kerek. Aptalyq saǵattyń azdyǵynan búginde matematıkanyń sapasy tómendep ketti. Bul pán 6 saǵattan kem bolmaýy kerek. Mysaly, Reseıde, Qytaıda da 6 saǵattan az emes. Bizde qazir 3 saǵatqa tómendetip jiberdi. Astanada ótetin sezde aldymen osy másele kóterilýi qajet. Ekinshiden, oqýshylardy matematıka páninen ekige bólip oqytý kerek. Matematıka durys ómir súrý úshin qajet, sondyqtan bul pán 11-synypqa deıin oqytylýy kerek, men áriptesterimniń 5-6 synyptan keıin deńgeılep bólip oqytý kerek degen usynystaryna qosylmaımyn»,-dedi №126 fızıka-matematıka mektep- lıtseıdiń dırektory, «Qurmet» ordeniniń ıegeri Ábdimájıt Ótesh.

№143 mekteptiń matematıka pániniń muǵalimi Roza Álibaevanyń aıtýynsha, matematıka pánine bólinetin saǵattyń azdyǵynan oqýshylardyń matematıkadan bilim sapasy tómendeýde. «Jalpy bilim beretin mektepte matematıka sabaǵy 10-11 synyptarda 3-aq saǵat ótedi. Bul balalardyń tereń bilim alýyna jetispeıdi. Sondyqtan saǵat sanyn kóbeıtse, sonymen qatar, oqýlyqtardyń sapasyn jaqsartsa, kórneki quraldardyń sanyn kóbeıtse. Ár baǵdarlama boıynsha kórneki quraldar jetkiliksiz, al ony daıyndaý bizge edáýir salmaq túsiredi, sabaqqa kedergi jasaıdy. Sonymen qatar, úshinshi usynysym bar: matematıka kúrdeli pán bolǵandyqtan, balalardyń tereń bilim alýy úshin synyp oqýshylaryn topqa bólip oqytý kerek dep sanaımyn. Búginde bizde bir synypta 30 baladan oqıdy», -dedi ol. Roza Álibaeva sonymen qatar, kadr máselesine nazar aýdarý qajet dep atap ótti.

Al, matematıkalyq bilim salasyn artyrý jóninde óz pikirin bildirgen «Jańa ǵasyr» № 175 gımnazııanyń matematıka páni muǵalimi Kúlásh Júzjasarova: «Matematıka páni boıynsha jetistiktiń 90 paıyzy eńbeksúıgishtikke, 10 paıyzy talantqa baılanysty ekeni barshaǵa málim. Búgingi tańda daryndy oqýshylarmen jumys josparly jáne júıeli túrde júrgizilýi tıis dep sanaımyn. Usynysym - ǵalymdar men yntalylardyń, joǵarǵy oqý oryndary oqytýshylarynyń, mektep muǵalimderiniń, úıirme jetekshileriniń qozǵalysyn qoldaıtyn talantty oqýshylardy anyqtaý jáne qoldaý maqsatynda ár aýdanda matematıkalyq jarystar men olımpıadalar qaýymdastyǵyn uıymdastyrý qajet», -dedi.

Forýmnyń sońynda matematıka páni muǵalimderi І Seziniń delegattary saılanady dep josparlanýda.