Almatyda matematıka, fızıka jáne ınformatıka pánderinen Jáýtikov atyndaǵy VІ Halyqaralyq olımpıada ótedi
ALMATY. Qańtardyń 6-sy. QazAqparat /Názıra Eleýhan/ - Almatyda qańtar aıynyń 11-i men 17-si aralyǵynda matematıka, fızıka jáne ınformatıka pánderinen Jáýtikov atyndaǵy VІ Halyqaralyq olımpıada ótedi,
dep habarlaıdy QazAqparat.
Sharany uıymdastyrýshylar «Daryn» respýblıkalyq ǵylymı-tájirıbelik ortalyǵy men Orynbek Jáýtikov atyndaǵy daryndy balalarǵa arnalǵan respýblıkalyq mamandandyrylǵan fızıka-matematıkalyq orta mektep-ınternaty. QR Ǵylym jáne bilim mınıstrliginiń jáne Almaty qalasy ákiminiń qoldaýymen ótetin dástúrli olımpıadaǵa 16 elden 289 qatysýshydan turatyn 46 komanda qatysady. Qazaqstannan 6 komanda - Almaty qalasynan 2, Respýblıkalyq mamandandyrylǵan fızıka-matematıkalyq orta mektep-ınternatynan 21 qatysýshydan turatyn 3 komanda qatysady.
«Olımpıadanyń maqsaty - oqýshylar arasynda fızıka-matematıka ǵylymyn nasıhattaý, halyqaralyq baılanystyń damýy, basqa elderdiń mamandandyrylǵan mektepterimen dostyq qarym-qatynas ornatý, olımpıadany uıymdastyrý ári ótkizý tájirıbelerimen almasý jáne «Fızıka-matematıkalyq bilim arqyly uly dostyqqa» dep olımpıada urany aıtyp turǵandaı, Qazaqstannyń bilimi men mádenıeti deńgeıin basqa elderge kórsetý bolyp tabylady», deıdi olımpıadanyń bas úılestirýshisi Arhat Dolaev. Onyń aıtýynsha, bıylǵy jyly sarapshylardyń quramyn Bolgarııa, Reseı, Belarýs, Grýzııa, Armenııa, Ózbekstan, Ýkraına jáne Qazaqstan mamandary, sonymen qatar ár jastaǵy respýblıkalyq jáne halyqaralyq olımpıada jeńimpazdary, Qazaqstannyń iri oqý oryndarynyń stýdentteri tolyqtyrady.
