Almatyda matematıka, fızıka jáne ınformatıka pánderinen Jáýtikov atyndaǵy VІ Halyqaralyq olımpıada ashyldy
; ALMATY. Qańtardyń 12-si. QazAqparat /Názıra Eleýhan/ - Búgin Almatyda ál-Farabı atyndaǵy QazUÝ-niń Stýdentter saraıynda matematıka, fızıka jáne ınformatıka pánderinen Jáýtikov atyndaǵy dástúrli VІ Halyqaralyq olımpıadanyń saltanatty ashylý rásimi ótti,
dep habarlaıdy QazAqparat.
«Bul olımpıada ıntellektýaldy halyqaralyq jarystardyń arasynda bedeldi oryn alady. Álemde teńdesi joq olımpıada dárejesi jyldan jylǵa ósip keledi. Bunyń ózi memleket tarapynan talantty jastarǵa qoldaý kórsetiletindigin aıǵaqtaıdy», dedi QR Bilim jáne ǵylym mınıstrligi orta bilim departamentiniń dırektory Nurǵalı Arshabekov.
«Olımpıadaǵa qatysýshylardyń sany jyldan jylǵa ósip keledi. Biz jas talanttardy, bıylǵy jyly EQYU-na tóraǵalyq etetin birinshi Eýrazııalyq memlekette sizderdi kórgenimizge qýanyshtymyz. Sonymen qatar, bıylǵy jyly jazda bolatyn 51-shi Álemdik matematıka páninen ótetin olımpıadanyń ıesi bolatyndyǵymyzdyń mańyzdylyǵyn aıta ketkim keledi», dep atap ótti ashylý saltanatynda olımpıadanyń ádilqazylar tóraǵasy, ál-Fárabı atyndaǵy QazUÝ-niń rektory, akademık Baqytjan Jumaǵulov.
Olımpıadaǵa qatysýǵa álemniń 16 elinen; Bolgarııa, Reseı, Belarýs, Grýzııa, Armenııa, Ózbekstan, Ýkraına, Tájikstan, Túrikmenstan, Rýmynııa, Bolgarııa, Mysyr, Túrkııa, Indonezııa, Monǵolııa, Ázirbaıjan, Qyrǵyz Respýblıkasynan 312 qatysýshydan turatyn 49 komanda keldi. Bıylǵy olımpıadaǵa Túrikmenstan jáne Mysyr elderiniń komandalary birinshi ret qatysady. 4-5-shi Jáýtikov olımpıadasynyń gran-prı ıegerleri Máskeý komandasy, sonymen qatar eń myqty komandalardyń biri sanalatyn Rýmynııa túlenkteri bıylǵy jylǵy jarysqa qatysýǵa nıet bildirgen.
Halyqaralyq ádilqazylar alqasynyń quramynda 8 eldiń: Qazaqstan, Bolgarııa, Reseı, Belarýs, Armenııa, Ózbekstan, Ýkraına, Bolgarııa, Grýzııa ǵalymdary jumys isteıtin bolady.
Olımpıada qańtar aıynyń 17-ne deıin ótedi.
