Almatyda máslıhat depýtattary men qoǵamdyq keńes músheleri koronavırýsqa qarsy vaktsına aldy
ALMATY. QazAqparat- Búgin Almaty qalasy máslıhatynyń depýtattary men qala ákimdigine qarasty qoǵamdyq keńes músheleri COVID-19-ǵa qarsy vaktsına saldyrdy, dep habarlaıdy QazAqparat tilshisi.
Vaktsınatsııa №17 emhanada ótti. Eriktileler qatarynda Almaty qalasy ákimdigine qarasty qoǵamdyq keńes músheleri - Nurlan Jazylbekov, Janat Qasymjanova, Maqsut Kuljanov bar. Sonymen qatar, Almaty qalasy máslıhatynyń depýtatary Altynaı Kóbeeva men Ermahan Ibraıymovta koronavırýsqa qarsy ekpe aldy.
Vaktsınatsııa aldynda depýtattar men qoǵamdyq keńes músheleri dárigerden keńes alyp, tekserýden ótti. Ekpeden keıin olar arnaıy bólingen bólmede dárigerlerdiń baqylaýynda jarty saǵat boldy.
«Biz vaktsına saldyrý arqyly ózimiz úlgi kórsetip, azamattyq ustanymymyzdy tanytqymyz keldi. Árqaısymyz burynǵy erkin ómirge qaıta oralǵymyz keledi, jaqsy kóńil-kúımen jumysqa barǵymyz keledi, qoǵmdyq oryndarda demalyp, deneshynyqtyrý ne sportpen aınalysqymyz keledi, sondyqtan vaktsına saldyrý nátıjesinde eshqandaı shekteýsiz ómir súre alamyz, ózimizdi jáne jaqyndarymyzdy aýrýdan qorǵaı alamyz. COVID-19-dy toqtatýdyń naqty joly vaktsına saldyrtyp, ujymdyq ımmýnıtet qalyptastyrý ekenin árqaısymyz túsinýimiz kerek»,-deıdi Altynaı Kóbeeva.
Depýtattardyń aıtýynsha, qala turǵyndaryna qazir vaktsına saldyrý úshin barlyq jaǵdaılar jasalǵan, óz qalaýymen ár turǵyn tańdaǵan emhanasynda, Saýda oıyn-saýyq ortalyqtarynda jáne basqa da iri qoǵamdyq oryndarda vaktsınany erikti túrde saldyra alady. Ondaı oryndardyń tizimi qala ákimdiginiń resmı áleýmettik jelide jáne saıtynda jarııalanǵan.
Vaktsına saldyrý úshin E-gov, Call-ortalyqtary nemese emhanalardaǵy jedel júıeler arqyly aldyn ala jazylyp qoıýǵa bolady, ne emhanaǵa tikeleı baryp saldyrtýǵa da bolady. Biz ózimiz kórsetken úlgimiz arqyly qala turǵyndary durys tańdaý jasaıdy dep senemiz jáne barlyǵymyz birge COVID-19-dy jeńýimiz kerek.
