Almatyda Máskeý túbindegi shaıqastyń qatysýshylary ulyqtaldy
ALMATY. 17 aqpan. QazAqparat - Uly Otan soǵysynyń ardagerleri jyldan jylǵa azaıyp barady. Olardyń árqaısysyna bizdiń osyndaı beıbit ómirimiz úshin qurmet kórsetýge mindettimiz.
Osy soǵystyń qıynshylyǵynan ótip, aman qalǵan qarttarymyzǵa uzaq ómir, zor densaýlyq, jaqyndaryńyzdyń syılastyǵyn tilegimiz keledi. Bul týraly búgin Almatyda Máskeý túbindegi shaıqasqa 70 jyl tolýyna oraı ótkizilgen saltanatty kesh barysynda Áýezov aýdany ákimi Bekqalı Torǵaev aıtty.
Áýezov aýdany ákiminiń apparaty uıymdastyrǵan shara Radıoelektronıka jáne baılanys áskerı-ınjenerlik ınstıtýtynda ótti.
Saltanatty is-sharaǵa Áýezov aýdanynyń ákimi Bekqalı Torǵaev, Uly Otan soǵysynyń ardagerleri, ınstıtýt basshylary men kýrsanttary qatysty. Qatysýshylar nazaryna kontserttik baǵdarlama, «Máskeý tóńiregindegi shaıqas» atty beınefılm usynyldy. Shara barysynda Uly Otan soǵysy ardagerleri, Máskeý túbindegi shaıqastyń qatysýshylary Abdashar Amrenovke, Nıkolaı Ivanovqa, Semen Kalınınge jáne taǵy da basqa ardagerlerge mereıtoılyq medaldar tabystaldy.
«Áýezov aýdanynyń ákimdigi ár ardagerdi jaqsy biledi. Ákimdik tarapynan 9 mamyr jáne basqa da merekeler kezinde soǵys ardagerlerine materıaldyq kómek pen syılyqtar tabystalady. Biz ardagerlerge tek merekede ǵana emes, kúndelikti kóńil bólýdemiz»,-dep atap ótti aýdan ákimi.
Bul kúnderi Reseıde Máskeý túbindegi shaıqastaǵy jeńis merekesi toılanýda. Bul jeńiske Qazaqstannyń azamattary da zor úles qosqan. Sol surapyl maıdanǵa júz myńdap jerlesterimiz attanǵan bolatyn. Orta Azııada qurylǵan 316-shy jaıaý ásker dıvızııasynyń 28 gvardııalyq-panfılovshylardyń erlikteri búkil álemge umytylmastaı tarıh qaldyrdy. Máskeýdi Qyzyl Armııanyń quramyndaǵy 5 qazaqstandyq dıvızııa jáne 3 atqyshtar brıgadasy qorǵaǵan. Maıdanǵa qajetti qarý-jaraq óndiretin ónerkásipterde bizdiń respýblıkamyzdyń jumysshylary retinde áıelder de, balalar men qarttar da teńdesiz kúsh-jigerin saldy.
