Almatyda maskasyz júrgeni úshin aıyppul salý bastaldy - Naýryzbaı aýdanynyń ákimdigi
ALMATY. QazAqparat - Bul týraly Almaty qalasynyń óńirlik kommýnıkatsııalar qyzmetiniń alańynda ótken onlaın brıfıng barysynda Almatynyń Naýryzbaı aýdany ákiminiń orynbasary Baǵlan Dándibaev habarlady.
Qala turǵyndary arasynda aýyrý jaǵdaılaryn azaıtý maqsatynda barlyq aýdandardyń aýmaqtarynda maska rejımi men áleýmettik qashyqtyqty saqtaý mańyzy týraly kúsheıtilgen aqparattyq-túsindirý jumystary júrgizilýde.
Qalada epıdemıologııalyq jaǵdaıdyń nasharlaýyn boldyrmaý úshin qatań shekteý sharalary qabyldanǵany belgili, olardy buzǵany úshin ákimshilik jaýapkershilik qarastyrylǵan. Osyǵan baılanysty Almatyda kásipkerlik sýbektileri men qala turǵyndarynyń karantındik sharalaryn, sonyń ishinde maska rejımine qatysty buzýshylyqtardy anyqtaý boıynsha monıtorıngtik toptar jumys isteıdi.
Almatynyń Naýryzbaı aýdany ákiminiń orynbasary Baǵlan Dándibaevtyń aıtýynsha, aýdan aýmaǵynda halyq tarapynan maska rejımin buzýshylardy anyqtaý boıynsha jumystar belsendi júrgizilip jatyr.
«Búginde karantın rejımin buzýǵa qatysty 41 ákimshilik materıal toltyryldy. Olardyń arasynda 24 jeke tulǵaǵa maska kımegenderi úshin jáne 14 kásipkerlik obektilerine sanıtarlyq normalardy saqtamaǵany úshin jaýapkershilik júkteldi. Jabyq ǵımarattardyń kireberis esikteri men kóshelerge aqparattyq materıaldar ilip qoıǵanymyzǵa qaramastan, maska rejımin buzatyn adamdar bar», — dedi Baǵlan Dándibaev.
Sondaı-aq, ol maska rejımin buzǵandary úshin turǵyndardyń aıyppul tóleı bastaǵanyn atap ótti. Jalpy, turǵyndardyń karantın rejımin saqtaýyn qamtamasyz etý boıynsha júrgizilip jatqan jumystarǵa túsinistikpen qaraıtyny atap ótildi.
Jalpy Naýryzbaı aýdanynda COVID-19-dyń aldyn alýda 2943 arnaıy aqparattyq materıaldar: saıabaqtarda, skverlerde, aýlalarda jáne jol qıylystarynda, TQKO, dárihanalarda jáne avtokólik jýý oryndarynda, sýpermarketterde, dúkenderde jáne aıaldamalarda, emhanalarda, kópqabatty turǵyn úılerde ornatylǵan. Jeke aqparattyq býkletterdi adamdar kóp jınalatyn oryndarda taratady.
