Almatyda maska satyp baıymaq bolǵandar ustaldy
ALMATY. QazAqparat – Almatyda maska satýmen aınalysqan alypsatarlar ustaldy, dep habarlaıdy QazAqparat tilshisi.
Mamandardyń aıtýynsha, bul - osy qaladaǵy altynshy jaǵdaı.
22 naýryzda QR QM Qarjy monıtorıngi komıtetiniń Almaty ekonomıkalyq tekserý departamenti jalpy quny 90 000 000 teńge bolatyn 664 400 maska satqan jeke tulǵany ustady.
«Jeke tulǵa maskany ruqsat qaǵazynsyz saýdalaǵan. Sonymen qatar onyń jeke kásipkerlikti tirkeý nómiri joq bolyp shyqty», - dedi departamentten.
QR Prezıdenti janyndaǵy tótenshe jaǵdaıdy qamtamasyz etý boıynsha memlekettik komıssııanyń №8 hattamasyna sáıkes, tárkilengen maska qalalyq qoǵamdyq densaýlyqty saqtaý basqarmasyna berildi.
Aıta ketý kerek, QR QM Qarjy monıtorıngi komıtetiniń taratqan aqparatyna sáıkes, 12 óńirlik ekonomıkalyq tekserý departamentterinde osyndaı 17 derek tirkelgen.
3 mıllıonǵa jýyq maska (2 932 019 shtýk) densaýlyq saqtaý basqarmalaryna berildi.
Munyń aldynda alypsatarlardan tárkilengen maskalar qaladaǵy medıtsına mamandaryna taratylǵanyn habarlaǵan bolatynbyz.
