Almatyda maska baǵasy qandaı bolmaq

ALMATY. QazAqparat – Almatyda medıtsınalyq maska baǵasy retteldi. Bul týraly onlaın brıfıng kezinde qala ákiminiń orynbasary Saparbek Tuıaqbaev málimdedi, dep habarlaıdy QazAqparat tilshisi.

«Maska boıynsha qazir qalada 48 iri dárihana jelisi anyqtaldy. Olarǵa kún saıyn 80 myń maska jetkizilip turady. Búgin 50 myń maska jetkizemiz», - dedi S.Tuıaqbaev.

Onyń aıtýynsha, qazir ákimdik tórtjaqty kelisim jasasqan. Óndirýshi «Dolche farm» kompanııasy, ákimdik, farmatsevtıkalyq baqylaý departamenti, dárihanalar jelisi maskalardy óndirý men jetkizý, baǵa saıasaty boıynsha ýaǵdalastyqqa keldi.

«Endi 3 qabatty maska - 87 teńgeden, kómir fıltri bar maska - 111 teńgeden satylatyn boldy. «Dolche farm» kompanııasy qazir ekinshi óndiris jelisin iske qosty. Maska saýdasy dárihanalardaǵy kamera arqyly baqylanady», -dedi qala ákiminiń orynbasary.