Almatyda mas júrgizýshiniń kinásinen bir adam qaza tapty
ALMATY. QazAqparat - Almatyda Volkswagen kóliginiń mas júrgizýshisi adam ólimine soqtyrǵan jol apatyna sebepshi boldy, dep habarlaıdy QazAqparat.
Jol apaty Qulja tas jolynyń boıynda boldy. Jolaýshylary bar 415 baǵdardaǵy «Mercedes Sprinter» shaǵyn avtobýsy soltústik baǵytta bara jatqan. Al, ońtústikten kele jatqan Volkswagen jeńil kóligi kenet qarsy betke shyǵyp ketip avtobýstyń búıirinen soqqan. Soqqydan jeńil kólik aınalyp ketip, soltústikke baǵyt alǵan kók Mercedes-ti qaqqan.
Eki mashınaǵa soǵylǵan Volkswagen joldan shyǵyp taldarǵa tireledi.
Jol apatynan shaǵyn avtobýstaǵy jolaýshy 1978 jylǵy áıel kóz jumdy. Qoǵamdyq kóliktegi taǵy 5 jolaýshy aýrýhanaǵa jetkizildi. Polıtsııanyń bastapqy málimeti boıynsha Volkswagen júrgizýshisi ishimdik ishken.
