Almatyda mas júrgizýshi jol apatyna sebepker boldy
ALMATY. QazAqparat - Almatyda Volksvagen Golf aıdaǵan mas júrgizýshi jol apatyna sebepker boldy, dep habarlaıdy QazAqparat tilshisi.
Volksvagen Golf júrgizýshisi Momyshuly kóshesimen ońtústikke baǵyt alyp bara jatyp kólik tizgininen aırylyp qalǵan.
Osylaısha ol jol shetindegi turaqta turǵan Nexia kóligin soqqan.
Nexia kóligi jyljyp baryp Hundai kóligine soǵylysty.
Volksvagen Golf ekpinimen joldyń qarsy betine shyǵyp baryp toqtaǵan.
Jol apatynan Golf júrgizýshisi zardap shekti.
Ony kóshedegi adamdar kólikten áreń alyp shyqty. Kýá bolǵandardyń aıtýynsha, Golf júrgizýshisi mas bolǵan. Qazir er adam aýyr halde aýrýhanada jatyr.
