Almatyda mas kúıinde kólik júrgizgen 15 adam ustaldy
ALMATY. QazAqparat– Almatyda «Qaýipsiz jol» respýblıkalyq jedel-profılaktıkalyq is shara kezinde 15 mas kólik júrgizýshisi ustaldy, dep habarlaıdy QazAqparat tilshisi.
Almatyda kólik júrgizý mádenıetin arttyrý, jolda kóliktik tártipti qalyptastyrý jáne jol-kólik oqıǵalarynyń sanyn azaıtý maqsatynda «Qaýipsiz jol» respýblıkalyq jedel-profılaktıkalyq is sharasy ótýde.
«Almaty kóshelerinde júrgizilgen reıd barysynda jol qozǵalysy erejelerin buzýdyń 3 myńnan astam faktisi anyqtaldy. Manevr erejesin saqtamaǵandar – 401, kólik quralyn basqarý kezinde uıaly telefon paıdalanǵandar - 222, qaýipsizdik belbeýin taqpaǵandar - 219, apattyq jaǵdaı týǵyzǵan - 50, baǵdarshamnyń eskertý túsi janǵanda ótip ketkender – 19, qarama-qarsy qozǵalys jolaǵyna shyǵý - 6 jáne mas kúıinde kólik júrgizgen - 15 adam anyqtaldy. Aıta ketý kerek, reıd barysynda ınspektorlar profılaktıkalyq jáne quqyqtyq jumystarǵa erekshe nazar aýdardy», - deıdi Almaty qalalyq jergilikti polıtsııa qyzmetiniń bastyǵy Tórehan Isın.
