Almatyda mas kúıinde kólik aıdap, adam óltirgen áıel qamaldy
ALMATY. QazAqparat – Almatyda mas kúıinde kólik tizgindep, adam qaqqan áıel qamaýǵa alyndy, dep habarlaıdy QazAqparat tilshisi.
Jol apaty 17 qarashada bolǵan. Rozybakıev kóshesimen kele jatqan 27 jastaǵy Hyundai júrgizýshisi «Mega» saýda úıiniń qasynda er adamdy qaǵyp ketken bolatyn. Keıin anyqtalǵandaı, áıel mas bolǵan. Soqqy alǵan er adam sol jerde kóz jumdy.
«Tergeý soty áıeldi 2 aı merzimge qamaý týraly sheshim shyǵardy. Kúdikti 2020 jyldyń 29 qańtaryna deıin qamaýda otyrady», - dedi Almaty qalalyq sotynan.
Jol apatynan soń júrgizýshi qamaýǵa alynǵan bolatyn. Alaıda keıin ol esh jaqqa ketpeý týraly qolhatpen bosap shyqqan edi.
