Almatyda mas kondýktor jolaýshy áıeldi soqqyǵa jyqty
ALMATY. Qazaqparat - Almatyda 16 marshrýt avtobýsynyń mas kondýktory áıeldi soqqyǵa jyqty, dep habarlaıdy Qazaqparat tilshisi.
Zardap shekken áıel bul týraly QR ІІM basshysy Qalmuhanbet Qasymovtyń jeke blogyna jazdy.
Kelinshektiń aıtýynsha, oqıǵa 28 maýsymda 16 marshrýtta bolǵan.
Oqys oqıǵadan soń áıel Medeý aýdandyq ІІB aryz jazdy.
"Meniń betim isip tur. Sol jaq kózim buldyraıdy. Kózimniń aınalasyna qan uıyǵan. Mıym shaıqalǵan. Psıhologııalyq jaǵdaıym óte múshkil. Sol jaq qolym uııdy. Aýzymdy áreń ashamyn. Sol úshin jumysymnan qalyp, emdelýge májbúrmin", - dedi ol.
Sonymen qatar, kelinshek mınıstrden deni durys emes, ishimdikqumar adamdy jumysqa alǵany úshin avtobýs parkin jaýapqa tartýdy suraıdy.
«Zań ókili retinde sizden avtobýs parkin jaýapqa tartýdy suraımyn.
"Men kómekke shaqyrǵanda júrgizýshi qarap turǵanymen qoımaı, meni psıhologııalyq naýqas dedi. Meni qorǵaýyńyzdy ótinemin", dep jazady ol.
Áıel halyqaralyq adam quqyǵyn qorǵaý sotyna da júginbek.
Mınıstr Qalmuhanbet Qasymov áıeldiń aryzyna jaýap berdi.
Onyń aıtýynsha, marshrýt kondýktory QR QK 293 babynyń 1 bólimimen jaýapkershilikke tartylady.
«Kúdikti orta dárejede mas bolǵany anyqtaldy. Sol kúni atalǵan is boıynsha suraq-jaýap alyndy. Sot medıtsınalyq saraptama qorytyndysyna sáıkes, is-áreketine protsessýaldy sheshim shyǵarylatyn bolady", - dedi mınıstr.
