Almatyda «Mars» operatsııasy. «Ólim alqabyndaǵy» qazaqtar» dep atalatyn jańa kitaptyń tusaýkeseri ótti
Ony kitap avtory Káken Ábenov búgin QR Ortalyq memlekettik muraǵatynda ótken tusaýkeser rásimde aıtty, dep habarlaıdy QazAqparat.
«1941 jyly Qazaqstanda 2 Qazaq brıgadasy quryldy. 100-shi brıgada Almatyda, 101-shi brıgada Aqtóbede. Olar bir ýaqytta, bir kúnde 1942 jyly qarashanyń 25-i kúni Rjev túbinde soǵysqa kirdi. Onda óte qatty urys boldy. Bir aıdyń ishinde 80 paıyzymyz oqqa ushty. Kalının maıdanynda 39-shy Armııanyń quramynda Rjev plańdarmynda soǵysqan jáne KSRO áskerı basshylyǵynyń «Mars» áskerı operatsııasyn júzege asyrý barysynda qaza tapqan marqumdardy este qaldyrý maqsatynda osy kitapty jazdym», deıdi 100-shi brıgadanyń múshesi Káken Ábenov. Ardagerdiń aıtýynsha, keıin ol quramynda bolǵan 100-shi brıgadany qaıta jasaqtaǵan kezde 6 myń adamnan 530-y ǵana aman qalǵany belgili boldy. Alaıda bul týraly aıtýǵa tıym salynǵandyqtan, oǵan uzaq jyldar boıy baǵa berilmeı keldi. Tek 60 jyldan keıin ǵana Rjov aýdanynda izdeý toby qurylyp, Qorǵanys mınıstrliginiń Máskeýdegi ortalyq muraǵatynan Rjovta oqqa ushqandardyń tizimi jasalǵan.
Qazir tarıhshylar Rjov shaıqasyn Stalıngrad shaıqasymen teńestirip júr. Tipti keıbir zertteýshiler áskerı tehnıkalar men áskerı jeke quramdardaǵy jaýyngerlerdiń shyǵyny boıynsha onyń Stalıngrad shaıqasynan asyp ketetinin dáleldep shyqty. Rjov platsdarmyn nemister Máskeýge jasalynatyn ekinshi joryqtyń bastamasy dep sanady. Al Keńes ásker basshylyǵy olardyń «Ortalyq» dep atalatyn negizgi armııasyn general Paýlıýstiń armııasyna kómek kórsetýine tosqaýyl qoıýdy maqsat tutty. Sondyqtan da Keńes armııasynyń Stalıngradtaǵy jeńisine Batys jáne Kalının maıdanyndaǵy áskerler zor úles qosqanyn umytpaýymyz kerek», deıdi maıdanger Káken Ábenov. Onyń sózine qaraǵanda, eki eldiń úkimetteri Rjovta jáne Almaty men Aqtóbede 100, 101-shi brıgada maıdangerlerine eskertkish qoıý úshin arnaıy qaýly shyǵaryp otyr.
