Almatyda marafon kezinde qaı kósheler jabylady
ALMATY. QazAqparat - 21 sáýirde ótetin «Almaty marafon - 2019» jarysy kezinde Almatyda birqatar kóshelerde jol qozǵalysy shekteledi, dep habarlaıdy QazAqparat tilshisi.
Bul kúni saǵat 05:00-den 14:00-ge deıin marafon qashyqtyqtary ótetin joldar qozǵalysy jartylaı toqtatylady.
Sátpaev kóshesi boıymen Jeltoqsan kóshesinen bastap Nazarbaev dańǵylyna deıin qozǵalys 20 sáýirde saǵat kúndizgi 14.00-den bastap 21 sáýir 17.00-ge deıin toqtatylady.
Nazarbaev dańǵyly boıymen Sátpaev kóshesinen bastap Ál-Farabı daǵylyna deıin qozǵalys saǵat 05:00 bastap 12:00 deıin toqtatylady.
Ál-Farabı dańǵyly boıymen Nazarbaev dańǵylynan bastap Dostyq kóshesine deıin qozǵalys saǵat 05:00 bastap 09:30 deıin toqtatylady.
Ál-Farabı dańǵyly boıymen Nazarbaev dańǵylynan bastap Shashkın kóshesine deıin qozǵalys saǵat 05:00 bastap 12:00 deıin toqtatylady. Ál-Farabı dańǵylynyń ońtústik bóligi avtokólik qozǵalysy úshin ashyq bolady.
Ál-Farabı dańǵyly boıymen Shashkın kóshesinen bastap Saıyn kóshesine deıin qozǵalys saǵat 05:00 bastap 13:30 deıin toqtatylady. Ál-Farabı dańǵylynyń ońtústik bóligi avtokólik qozǵalysy úshin ashyq bolady.
Saıyn kóshesimen qozǵalys Ál-Farabı dańǵylynan bastap Abaı dańǵylyna deıin saǵat 05:00 bastap 13:30 deıin toqtatylady. Batys bóligi ǵana ashyq bolady.
Abaı dańǵylynyń Saıyn kóshesinen bastap Baıtursynuly kóshesine deıingi, Baıtursynuly kóshesiniń Abaı dańǵylynan Sátpaev kóshesine deıingi bóliginde saǵat 05:00 bastap 14:00 deıin jol qozǵalysy toqtatylady. Soltústik bóligi avtokólik úshin ashyq bolady.
Shashkın kóshesiniń Ál-Farabı dańǵylynan Tımırıazev kóshesine deıingi, Tımırıazev kóshesiniń Shashkın kóshesinen bastap Baızaqov kóshesine deıingi, Baızaqov kóshesiniń Tımırıazev kóshesinen bastap Sátpaev kóshesine deıingi, Sátpaev kóshesiniń Baızaqov kóshesinen bastap Baıtursynuly kóshesine deıingi bóligi 05:00 bastap 10:35 deıin jabylady.
«Joldarda qarbalastyń bolýyna baılanysty marafon qatysýshylaryna start ornyna (Respýblıka alańy) Abaı dańǵyly arqyly metromen nemese Abaı dańǵyly arqyly avtobýspen (qozǵalys soltústik jaǵymen) jetýge keńes beremiz. Start-máre qalashyǵy janynda (Respýblıka alańy) kólikti turaqqa qaldyrýda qıyndyqtar bolatynyn eskertemiz», - dedi uıymdastyrýshylar.
