Almatyda «Máńgilik El» saǵaty ashyldy
Arhıtektýralyq nysan Ál-Farabı atyndaǵy Qazaq ulttyq ýnıversıtetiniń qalashyǵynda ornatyldy. Bul ýnıversıtettiń 1985 jylǵy túlekteriniń Táýelsizdiktiń 30 jyldyǵyna oraı ýnıversıtetke jasaǵan tartýy boldy.
Saǵattyń ashylý saltanatyna Qazaqstan Respýblıkasy Konstıtýtsııalyq Keńesiniń Tóraǵasy, Túlekter qaýymdastyǵynyń prezıdenti Qaırat Mámı, Qazaqstan Respýblıkasy Joǵarǵy Sotynyń qylmystyq ister jónindegi sot alqasynyń tóraǵasy Ábdirashıt Júkenov, QazUÝ rektory Janseıit Túımebaev, memleket jáne qoǵam qaıratkeri Oljas Súleımenov, QazUÝ túlekteri, zııaly qaýym ókilderi, demeýshiler, stýdentter qatysty.
Shara barysynda sóz sóılegen Ál-Farabı atyndaǵy Qazaq ulttyq ýnıversıtetiniń rektory Janseıit Túımebaev saǵattyń nelikten «Máńgilik el» dep atalýyna toqtaldy.
«Elbasy Nursultan Nazarbaev «Máńgilik El» ıdeıasynda naqtylap kórsetkendeı, táýelsizdikpen birge halqymyz máńgilik muratyna qol jetkizdi. Máńgilik el bolý - bizdiń basty maqsatymyz. Osy oraıda 2016 jyly ýnıversıtetimizde «Máńgilik El» saltanat qaqpasy ashylǵan bolatyn. Sol qaqpadan bastap «Máńgilik El» ortalyq alleıasy ulasyp jatyr. Al, qazirgi ashylyp jatqan saǵat stellasy osy bastamalardyń jalǵasy dep bilemiz. Barshalaryńyzdy búgingi «Máńgilik el» saǵat stelasynyń saltanatty túrde ashylýymen quttyqtaımyn»,- dedi rektor.
QR Konstıtýtsııalyq Keńesiniń Tóraǵasy, Túlekter qaýymdastyǵynyń prezıdenti Qaırat Mámı jobanyń maqsaty – QazUÝ qalashyǵynyń turǵyndary men qonaqtary úshin jaıly orta qurý ekenin aıtty.
«Búgingi kúni Qazaq ulttyq ýnıversıteti qalashyǵynyń kórkeıýine úles qosý maqsatynda kóptegen nysandar boı kóterdi. Osy saǵat stelasy da túlekter qaýymdastyǵynyń bastaýymen júzege asyp otyr. Jasalǵan jumystardy men maqtanyshpen aıta alamyn»,-dedi Qaırat Mámı.
Sondaı-aq, sharaǵa arnaıy qatysqan Qazaqstannyń memleket jáne qoǵam qaıratkeri Oljas Súleımenov, elge tanymal QazUÝ túlekteri: QR Joǵarǵy Sotynyń qylmystyq ister jónindegi sot alqasynyń tóraǵasy Ábdirashıt Júkenov pen bıologııa ǵylymdarynyń doktory Saltanat Baıqoshqarova quttyqtaý sózder sóılep, lebizderin bildirdi.
Aıta keteıik, «Máńgilik El» saǵaty bıiktigi 19,3 metr stelaǵa, stýdentterdiń jıi júretin jolǵa ornatyldy. Nysan qurylysynyń negizgi irgetasy tórt tuǵyrly bıik baǵanalarmen bekitilgen.
