Almatyda manevrlik poıyz jeńil kóliktermen soqtyǵysty

ALMATY. QazAqparat – Almaty stantsııasynda kúzetiletin temirjol ótkelinde manevrlik quram kólikterge soǵyldy, dep habarlaıdy QazAqparat tilshisi.

Facebook qoldanýshysy oqıǵa ornynan fotosýretterdi jarııalady. Aıtylyp ótkendeı, quramnyń eki kólikpen soqtyǵysýy Býrýndaıskaıa kóshesindegi temirjol ótkelinde bolǵan.

«Joǵary jyldamdyqpen ýaqytsha saqtaý qoımasyna bet alǵan manevrlik quram eki baǵyt boıynsha ótkelden ótip jatqan mashınalar aǵynyna soǵyldy. Shlagbaým ashyq turǵan, baǵdarsham istegen joq, ótkel kezekshisi jol apaty bolǵan soń ǵana kabınasynan shyqty. Eki kólik zardap shekti», - dep jazylǵan.

«Qazaqstan temir joly» ulttyq kompanııasynyń baspasóz qyzmetinen málim etkendeı, oqıǵa 6 mamyr, tańǵy saǵat 09:42-de jeke kirme joldyń kúzetiletin temirjol ótkelinde bolǵan.

«Qaza tapqandar men zardap shekkender joq. Temirjol ótkelindegi dabyl durys jumys istep tur. Ótkeldegi kezekshi – jeke kásiporynnyń qyzmetkeri», - dep habarlady QTJ baspasóz qyzmetinen.

Sonymen qatar «QTJ» UK avtokólik júrgizýshilerin temirjol ótkelinen ótý kezinde muqııat bolýǵa jáne jol erejelerin múltiksiz saqtaýǵa shaqyrdy.

Aıta keteıik, buǵan deıin Almatyda temirjol boıyna shyǵyp ketken samokatshynyń kesirinen mashınıst jolaýshy poıyzyn shuǵyl toqtatýǵa májbúr bolǵan edi.

Temirjol boıynda bolǵan taǵy bir oqıǵa – Almaty oblysynda er adam poıyzdyń júrýine kedergi keltirip, tas laqtyrǵan.