Almatyda mamyr aıynyń sońynda 34 gradýsqa deıin ystyq bolady
ALMATY. QazAqparat – Almatyda mamyr aıynda ortasha aılyq temperatýra normadan joǵary bolady. Bul rette jaýyn-shashyn mol jaýatyny kútiledi. Bul týraly Qazgıdromet málim etti, dep habarlaıdy QazAqparat tilshisi.
Sınoptıkterdiń boljamyna sáıkes, bul aıda Almatyda ortasha aýa temperatýrasy +17,5 gradýs bolady.
«Alǵashqy onkúndiktiń basynda temperatýra túnde +10+15-ten +5+10 gradýsqa deıin, kúndiz +27+32-den +20+25 gradýsqa deıin aýytqıdy dep kútiledi. Onkúndiktiń sońynda túnde +5+10, kúndiz +15+20 gradýsqa deıin tómendeýi yqtımal», - dedi «Qazıdromet» RMK dırektory Marına Shmıdt.
Aýa raıyn uzaq merzimdi boljaý basqarmasynyń bastyǵy Juldyz Isabekovanyń aıtýynsha, ekinshi onkúndiktiń basynda aýa temperatýrasy tómendeıdi: túnde 0,+5 deıin, topyraq betinde 3 gradýsqa deıin, kúndiz +10+15 gradýsqa deıin.
«Al onkúndiktiń ortasynda temperatýra túnde +8+13, kúndiz +20+25 gradýsqa kóteriledi dep kútilýde. Keıin túnde +3+8, kúndiz +15+20 gradýsqa deıin tómendeıdi. Onkúndiktiń sońynda termometr baǵany birtindep joǵarylaıdy.
Úshinshi onkúndikte aýa temperatýrasy túnde +15+20, kúndiz +29+34 gradýsqa deıin kóteriletini boljanýda.
Mamyr aıynda jaýyn-shashyn mólsheri normadan joǵary túsedi. Jańbyr, naızaǵaı jáne 15-20 m/s ekpindegi jel jıi bolady dep kútiledi.
Ekinshi onkúndiktiń ortasy men sońynda tuman túsýi yqtımal», - dedi Juldyz Isabekova.
