Almatyda mamyr aıynyń sońyna qaraı taǵy da nóser jaýyn bolady - Qazgıdromet
ALMATY. QazAqparat - Almatyda mamyr aıynyń 29-30-shy juldyzy aralyǵynda nóser jaýyndar bolady. Bul týraly búgin Almatyda jaýyn-shashyn saldaryn joıý jumystaryna baılanysty ótken baspasóz máslıhaty barysynda «Qazgıdromet» RMK gıdroboljam bóliminiń bastyǵy Lıdııa Nıkıforova málim etti.
Onyń aıtýynsha, Almatyda maýsym aıynda mamyr aıyna qaraǵanda jaýyn-shashyn az bolady. Uzaq merzimdi boljam boıynsha jaz aıynyń alǵashqy aıynda jaýyn-shashynnyń mólsheri 45-60 mm. quraıdy. Taýly aımaqtarda jańbyr kóbirek jaýady dep kútilýde.
«Endi Almatyda aldaǵy birneshe kún boıy jańbyr bolmaıdy. Aýa temperatýrasy 18 gradýstan 25 gradýsqa deıin kóteriledi dep kútilýde. Degenmen, 29-30-shy mamyr aralyǵynda Almatyda taǵy da nóser jaýyn bolady», - dedi L. Nıkıforova.
Sonymen qatar, onyń aıtýynsha, Almatyda mundaı tolassyz jaýǵan jańbyr sońǵy 25-30 jyl ishinde bolmaǵan eken.
«Eger sáýir aıynda jaýyn-shashynnyń mólsheri ádettegi normadan joǵary bolǵanyn eskersek, muny shynynda da tótenshe ekstremaldy jaǵdaı dep baǵalaýǵa bolady. Bul sırek bolsa da kezdesip turatyn tabıǵı aýytqyma qubylys. Bunyń basqa sebepteri joq. Mysaly, zymyrannyń ushyrylýy mundaı qubylystarǵa ákep soqpaıdy. Bul ózi sondaı, tabıǵı qubylys. 2015 jyly Qaraǵandy oblysynda da jaıylma sel boldy emes pe!? Mine, bul da sondaı qubylys», - dedi sınoptık.
Aıta ketelik, Almatyda 16 mamyrdan bastap birneshe kún boıy tolassyz jańbyr jaýdy. Sonyń saldarynan qalada aýlalar men joldardy sý basty. Keıbir aýdandarda laı kóshkini oryn aldy. 16 mamyrda «Jibek joly» metrobeketiniń vestıbıýlin de sý basty.
Barlyǵy 127 jeke turǵyn úı men aýlalyq aýmaqtar sý astynda qaldy.
