Almatyda MÁMS júıesiniń arqasynda medıtsınalyq uıymdar sany artty

ALMATY. QazAqparat – Almatyda MÁMS júıesi engizilgeli medıtsınalyq uıymdardyń sany artty. Bul týraly «Áleýmettik medıtsınalyq saqtandyrý qory» UAO qalalyq fılıalynyń dırektory Nurlybek Qabdyqaparov aıtty, dep habarlaıdy QazAqparat tilshisi.

Onyń aıtýynsha, medıtsınalyq ońaltý jáne patsıent densaýlyǵyn qalpyna keltirý qyzmetin kórsetetin klınıkalar sany 62-ge jetti. Onyń 25-i – jeke menshik. Muny mindetti áleýmettik medıtsınalyq saqtandyrý júıesiniń basty artyqshylyqtarynyń biri deýge bolady.

Sonymen qatar, medıtsınalyq saqtandyrý qory 2020 jyly kepildendirilgen tegin kómek jáne áleýmettik medıtsınalyq saqtandyrý paketteri sheńberinde kórsetiletin qyzmetterdi satyp alý protsedýrasyn aıaqtady.

«2020 jyldyń bıýdjeti qorǵa 2017 jyldyń shildesinen beri jınaqtalǵan qarjyǵa qaraı, sondaı-aq, bolashaqta túsetin jarnalar men aýdarymdarǵa qatysty boljamdar negizinde jasaldy. Nátıjesinde, Almaty qalasy boıynsha 170 mlrd teńgeniń qyzmetin satyp alý jospary bekitildi. Onyń 104 mlrd teńgesi – tegin medıtsınalyq kómek paketine, 65,9 mlrd teńgesi – medıtsınalyq saqtandyrý paketine tıesili. Qarajat 2019 jylmen salystyrǵanda 42% artyp otyr», - dedi Nurlybek Qabdyqaparov.

Sondaı–aq, Almaty halqyna medıtsınalyq qyzmet kórsetetin densaýlyq saqtaý nysandarynyń bazasynda 271 emdeý uıymy tirkelgen. Onyń ishinde, saqtandyrý paketi sheńberinde 147 medıtsına uıymymen 218 kelisimshart bekitilgen. Saqtandyrý paketine tıesili kelisimsharttyń jalpy somasy 64,8 mlrd teńgeni qurap otyr.

Almaty qalasy Qoǵamdyq densaýlyq basqarmasy basshysy Tileýhan Ábildaevtyń aıtýynsha, 2020 jyldyń 31 naýryzyna deıin qazaqstandyqtardyń bári shartty túrde saqtandyrylǵan bolyp sanalady.

«Qazir elimizdiń barlyq azamattary MÁMS paketindegi qyzmetterdi saqtandyrylǵan-saqtandyrylmaǵanyna qaramastan paıdalana alady. Bul turǵyndardyń jańa júıeniń barlyq artyqshylyqtaryn sezinip, kórip-bilýi úshin jasalyp otyr. Al, sáýirdiń birinen bastap medıtsınalyq qyzmetti tolyq paıdalanǵysy keletin patsıent mindetti túrde saqtandyrylǵan bolýy shart. Turǵyndar statýsyn Telegram bottyń, e-gov portalynyń, sondaı-aq, qor men Densaýlyq saqtaý mınıstrligi saıtynyń kómegimen anyqtaı alady», - dedi Tileýhan Ábildaev.

Aıtýynsha, búgingi tańda ońtústik astanadaǵy barlyq medıtsına uıymdary halyqqa sapaly qyzmet kórsetýge qajetti ınfraqurylymdarmen tolyq jabdyqtalǵan.