Almatyda MÁMS sheńberinde 90,1 mlrd teńge kóleminde tegin operatsııalar jasaldy

ALMATY. QazAqparat – Almaty turǵyndaryna bıylǵy 9 aıda Mindetti áleýmettik medıtsınalyq saqtandyrý sheńberinde 90,1 mlrd teńge somasynda qyzmet kórsetildi. Bul týraly Medıtsınalyq saqtandyrý qory Almaty qalalyq fılıalynyń dırektory Tileýhan Ábildaev aıtty, dep habarlaıdy QazAqparat tilshisi.

Spıkerdiń aıtýynsha, sońǵy jyldary konsýltatıvtik-dıagnostıkalyq qyzmetterge suranys artqan. Oǵan ótken 9 aıdyń ishinde qor 18 mlrd teńge jumsaǵan. Sonymen qatar, MÁMS quny qymbat operatsııalardyń da shyǵynyn jabady.

«Saqtandyrý qarajaty esebinen kardıohırýrgııa, neırohırýrgııa, ýrologııa, travmatologııa, hırýrgııa, onkologııa, LOR profılderi boıynsha júzdegen ota jasalyp jatyr. Mundaı bir otanyń quny birneshe mıllıonǵa deıin jetip jyǵylýy múmkin. Mysaly, osy jyldyń 9 aıynda bir ǵana Almaty boıynsha 1300-den astam kardıohırýrgııalyq operatsııa jasalyp, oǵan qor tarapynan 5,7 mlrd teńge tólendi. Neırohırýrgııalyq profıl boıynsha 548 operatsııa jasalǵan. Oǵan 2,9 mlrd teńgeden astam qarjy tólendi», - dedi Tileýhan Ábildaev.

Búginde tize, jambas býyndaryn almastyrý operatsııalaryna degen suranys ta joǵary.

«Mysaly, osy jyldyń 9 aıynda 240-tan astam býyn almastyrý operatsııasy jasalyp, oǵan 438,5 mln qarjy tólendi. Sonymen qatar, Almaty qalasynda qańtar-qyrkúıek aralyǵynda jalpy quny 441 mln teńge turatyn 70-ten astam transplantatsııa jasaǵan. Olardyń ishinde 18 baýyr-búırek almastyrý operatsııasy da bar. Osynyń bári saqtandyrý arqyly kórsetilip jatqan qyzmetter», -dedi fılıal basshysy Tileýhan Ábildaev.