Almatyda MÁMS esebinen on jastaǵy balaǵa ota jasaldy
ALMATY. QazAqparat - Almatydaǵy №1 qalalyq klınıkalyq aýrýhana dárigerleri keýde qýysy ishke qaraı kirip, shuńqyr tárizdenip ketken 10 jastaǵy patsıentke operatsııa jasady.
Ota quny mindetti áleýmettik medıtsınalyq saqtandyrý (MÁMS) arqyly tólendi, dep habarlaıdy QazAqparat tilshisi.
«Balamnyń keýdesindegi patologııa kishkentaı kúninen boldy. Buryn-sońdy bul másele boıynsha dárigerge barǵan joqpyz. Biraq ýaqyt óte kele yńǵaısyzdyq týdyryp, keýdesi aýyra bastady. Keıingi kezde tez sharshap, tynystaýy qıyndap ketkenin aıtyp, shaǵymdanyp júrdi», - deıdi balanyń anasy.
Jan-jaqty teksere kele, torakaldy hırýrgtar ota jasaý týraly sheshim qabyldaǵan.
Nuss ádisine negizdelgen beınetorakaldy sternoplastıka MÁMS paketi sheńberinde jasaldy.
Shaǵyn ınvazıvti otadan keıin patsıent tez ońalyp, 3-4 kúnnen keıin aýrýhanadan shyǵýy tıis.
Torakaldy hırýrg Nurhat Júnisovtiń aıtýynsha, keýde qýysy deformatsııaǵa ushyraǵanda adam súıekteriniń qurylymy ózgeredi. Atalǵan patsıenttiń qabyrǵalary ishine kirip ketken. Sonyń saldarynan tynys alý organdary qysylyp, dem alýy qıyndaǵan.
«Keýde qýysynyń deformatsııasy ádette týa paıda bolatyn genetıkalyq aqaý bolyp tabylady. Bir jaqsysy, qazir ony hırýrgııalyq jolmen túzetýge bolady. Mundaı operatsııalardy ashylǵanyna 12 jyldan asqan bizdiń Torakaldy hırýrgııa ortalyǵynyń dárigerleri eresekterge de, jas balalarǵa da jasaıdy. Bizde emdelgen patsıentterdiń eń kishisiniń jasy 3-te, eń úlkeni 35-te», - dedi Nurhat Júnisov.
Ata-anasynyń sózine qaraǵanda, qazir balanyń jaǵdaıy jaqsy, eń bastysy patologııadan aryldy.
Esterińizge salsaq, 18 jasqa deıingi balalar memleket tarapynan saqtandyrylady jáne medıtsınalyq qyzmetti aqysyz paıdalana alady.
Torakaldy hırýrgııa bólimine keýde qýysy deformatsııasy baıqalǵan jaǵdaıda Almaty qalasy, Qalqaman yqsham aýdanyndaǵy №1 qalalyq klınıkalyq aýrýhanaǵa habarlasýǵa bolady.
