Almatyda mamandandyrylǵan tergeý soty ashyldy
ALMATY. QazAqparat - Almatyda mamandandyrylǵan tergeý sotynyń saltanatty ashylý rásimi boldy, dep habarlaıdy QazAqparat tilshisi.
«Bul sot halyq úshin ashyldy. Taǵdyry sotta sheshilip jatqan tulǵalar ashyq sotta óz quqyǵyn qorǵaıtyn bolady. Eger ashyq protseste kúdiktiniń aıybyn dáleldeıtin dálel keltiriletin bolsa, onyń bultartpaý sharasyn qabyldaýda qorǵaýshylar da, kúdiktiniń ózi de qatysatyn bolady», - dedi Almaty qalalyq sotynyń tóraǵasy Nurǵazy Ábdiqanov.
Munyń aldynda tergeý sotynyń qyzmetin prokýror atqaratyn.
Tergeý soty sýdıasynyń quzyryna qamaýdaǵy tulǵalardy bultartpaý sharasyn qabyldaý, úıqamaq nemese ekstradıtsııalyq qamaý, qyzmetinen shettetý, kepildeme qabyldaý, múlikke tyıym salý, múrdeni qaıta qazyp alý, halyqaralyq izdeý jarııalaý, tergeý oryndarynyń salǵyrttyǵyna qatysty shaǵym qabyldaý fýnktsııalary kirdi.
«Munyń aldynda prokýror ózi sheshim shyǵaratyn. Endi tergeý sotynyń sýdıasy ózi taraptardyń qatysýymen protsesýaldy sheshim shyǵarady. Protseske jýrnalıster de qatysa alady. Tergeý isiniń qupııalyǵyn saqtaý maqsatynda keıbir ister jabyq rejimde qaralady», - dedi sot tóraǵasy N.Ábdiqanov.
Mamandandyrylǵan aýdanaralyq tergeý soty Orbıta-2 shaǵynaýdanyna ornalasatyn bolady.
Sotta 7 sýdıa, 16 maman jumys jasamaq.
Sot tóraǵasy retinde Bolat Qatyqbaev taǵaıyndaldy.
Kúnine tergeý soty 50-60 is qaraıtyn bolady.
