Almatyda Mahatma Gandı ortalyǵy ashyldy
ALMATY. QazAqparat - Ál-Farabı atyndaǵy Qazaq Ulttyq ýnıversıtetinde Mahatma Gandı atyndaǵy ortalyq ashyldy, dep habarlaıdy Qazaqparat tilshisi.
Ortalyq ýnıversıtettiń Shyǵystaný fakýltetinde ashylyp otyr. Ortalyqtyń ashylýyna Úndistan Respýblıkasynyń Qazaqstandaǵy Tótenshe jáne Ókiletti Elshisi Prabhat Kýmar, Úndistan Respýblıkasynyń Almaty qalasyndaǵy Bas konsýly Shrı Martın Sırıas Slemens, Qazaqstandaǵy Úndistan Respýblıkasynyń áskerı attashesi polkovnık Mılan Nalavade jáne QazUÝ oqytýshylary men stýdentteri qatysty.
«Búgin tusaýy kesilip otyrǵan ortalyq úndi halqynyń tulǵasy Mahatma Gandı esimimen tikeleı baılanysty. «Álemniń ózgerýin qalasań, ózgeristi ózińnen basta» - degen naqyl sózdi mura etip qaldyrǵan Mahatma Gandı - Úndistandy Ulybrıtanııadan azat etýúshin kúresken ǵasyr adamy. 1992 jyly ýnıversıtetimizdiń shyǵystaný fakýltetinde únditaný bólimi ashyldy. Jıyrma alty jyl ishinde únditaný bólimin hındı, ýrdý tilderin meńgergen eki júzge jýyq shákirt bitirip shyqty. Olardyń ishinde, bakalavr, magıstr jáne PhD doktorlar bar»,- dedi QazUÝ rektory Ǵ.Mutanov.
Saltanatty jıynda sóz alǵan Úndistannyń Qazaqstandaǵy Tótenshe jáne Ókiletti Elshisi Prabhat Kýmar eki eldiń dostyǵyna toqtaldy.
«Mahatma Gandı shyn mánindegi ult kósemi dárejesine kóterilgen, uly murat jolynda qaıtpas jiger tanytqan tulǵa. Búginde Mahatma Gandı ortalyǵynyń QazUÝ-da ashylýy Úndistan men Qazaqstannyń myzǵymas dostyǵynyń dáleli», - dedi elshi.
Sonymen qatar shara sońynda qazaq, orys, aǵylshyn jáne hındı tilderindegi otandyq jáne sheteldik únditanýshy-ǵalymdardyń materıaldary usynylǵan kitap kórmesi uıymdastyrylyp, «Hındı-qazaq, qazaq-hındı sózdigi» kitabynyń tusaýkeser rásimi ótti.
