Almatyda «Mahabbat maýsymy» músháırasy ótedi

«Qazir jastar arasynda Valentın kúnin toılaý beleń aldy. Osyny ulttyq baǵytqa burý maqsatymen gazetke Serik Abbas-Shahtyń 15 sáýir kúnin mahabbat kúni retine atap ótý týraly usynys maqalasy shyqqan bolatyn. Osyǵan baılanysty qoldaý da, qarsy shyqqandar da boldy. Birinshi osy usynysty, ekinshiden aqyndardy qoldaý maqsatynda múshaıra uıymdastyrǵaly otyrmyz. Óıtkeni kóp aqynnyń eń alǵashqy óleńi mahabbattan bastalady»,- deıdi «Jas Qazaq úni» gazetiniń bas redaktory Qazybek Isa.

Onyń aıtýynsha, músháıraǵa kez kelgen jastaǵy aqyn qatysa alady. Talap boıynsha óleń kólemine shek qoıylmaıdy, tek jańa jazylǵan jyrlar bolýy tıis. Óleńderdi qabyldaý 15 mamyrda aıaqtalady. Qorytyndysy kóktemniń sońǵy kúnderi, ıaǵnı mamyr aıynyń aıaǵynda shyǵarylady.

Bas júldege ıe bolǵan aqynǵa «Turan» baspasy jyr jınaǵyn shyǵaryp bermek. Qalǵan júldegerlerdiń jyrlary «Mahabbat maýsymy» jınaǵyna kirgiziletin bolady. Sonymen qatar «Jas Qazaq úni» gazeti men «Juldyzdar qupııasy» jýrnalynda jaryq kórmek.

Úmitkerler óz óleńderin «Jas qazaq úni» gazetiniń redaktsııasyna nemese múshaıranyń www.mushaira.qazaquni.kz atty arnaıy saıtyna joldaı alady. Músháırany ótkizý ıdeıasynyń avtory Arshat Orazovtyń aıtýynsha, úmitkerlerdiń óleńderi osy saıtta jarııalanady. Oqyrmandar saıt arqyly unaǵan óleńge daýys berip, pikir qaldyra alady.