Almatyda magıstraldyq joldar men kósheler jelisiniń uzyndyǵy 2030 jylǵa qaraı 1,5 esege ulǵaıady - J. Aıtileý
Bul týraly búgin Almatyda «Atakent» iskerlik yntymaqtastyq ortalyǵynda ótken qoǵamdyq tyńdaý barysynda qalalyq Sáýlet jáne qala qurylysy basqarmasy basshysynyń birinshi orynbasary Janat Aıtileý málim etti. Basqosýda qalanyń 2030 jylǵa deıingi kezeńin qamtıtyn bas josparyna túzetý engizýdiń ekinshi kezeńi talqylandy.
Janat Aıtileýdiń aıtýynsha, Almaty qalasyna 2014 jyldyń sáýir aıynda 23200 gektar jer qosyldy. Sáıkesinshe, 92604 myń turǵyny bar 27 eldi meken qala aýmaǵyna endi. Al bul birinshi kezekte qala ortalyǵy men sol eldi mekenderdi baılanystyratyn jol-kóshe jelilerin retke keltirýdi talap etedi.
«Ókinishke qaraı, qala irgesindegi eldi mekenderdegi turǵyn úıler men kósheler kóp jaǵdaıda retsiz salynǵan. Bul qala kóshelerin syrtqa qaraı uzartýda úlken qıyndyqtar týǵyzady. Jol salý úshin jer ýchaskelerin satyp alý kerek. Buǵan orasan zor qarjy kerek. Deıturǵanmen, 2030 jylǵa deıin Almatynyń magıstraldyq joldary men kósheleri qalanyń qazirgi shekarasyna deıin uzartylady. Dálirek, Jandosov, Shalıapın, Tóle bı kósheleri men Abaı dańǵyly batysqa qaraı, Aqjar kenti men «Elim-aı» óndiristik keshenine deıin uzartylady. Ońtústikte Rysqulov, Aqan seri, Aqyn Sara jáne basqa da tıisti kósheler Jylý elektr stansasy men Rahat, Mádenıet, Boraldaı kentterine deıin tartylady. Al shyǵysqa baǵyttalǵan kósheler Qaırat, Kolhozshy, Besaǵash kentterine deıin uzartylady. Bul jerde Besaǵashtyń ózi qala aýmaǵyna engen joq», - dedi J. Aıtileý.
Taǵy bir aıta ketetin jáıt, qalanyń batys jaǵynda «Altyn orda» kóterme saýda bazary arqyly ótetin Raıymbek dańǵylyndaǵy kólik keptelisin azaıtý úshin jaqyn bolashaqta Raıymbek dańǵylynyń janynan jańadan janama jol salynady.
Sonymen qatar, bolashaqta qalada shapshań jolaýshy tasymaly júıesi de damıtyn bolady. ıAǵnı, qoǵamdyq kólikter óz aldyna bólek jolaqtarmen júredi. Al qalaǵa shetten keletin avtokólikterdiń sanyn shekteý maqsatynda qalaǵa kireberis joldarda avtostansalar men úlken avtoturaqtar salynatyn bolady.
