Almatyda Mádına Eralıevanyń shyǵarmashylyǵyna arnalǵan án baıqaýy ótti
ALMATY. QazAqparat - Búgin Almatyda Qyzdar ýnıversıtetinde Almaty qalasynyń stýdent jastary arasynda QR Eńbek sińirgen ártisi, ánshi Mádına Eralıevanyń shyǵarmashylyǵyna arnalǵan «Kúreń kúzde kúlimdep shyqqan kún ediń...» atty án baıqaýy bolyp ótti.
Bul týraly atalmysh joǵary oqý ornynyń baspasóz qyzmetinen habarlady.
Shara Mádına Eralıevany eske alýǵa arnalǵan ádebı-mýzykalyq kompozıtsııamen bastaldy. Qoıylym barysynda Qyzdar ýnıversıtetiniń stýdenti Aızada Tóletaı ózi shyǵarǵan ánin oryndady. Keıin ánshiniń kózin kórgen áriptes, qyzmettes bolǵan ónerdegi dostary - Gúlzııa Baıbosynova, Baqyt Shadaeva, Janar Aıjanova, Gúlfaırýz Dalǵabaı, Yqylas Nurǵalıev, Tilek Orazalıev jáne Zámzagúl Sháripqyzy Mádınany saǵynyshpen eske aldy.
«Mádına týraly bir kúnde aıtyp taýysý múmkin emes. Ol ánshi ǵana emes, segiz-qyrly bir syrly jan edi. Kıimderdiń túr-túrin tigip alatyn ismer, oǵan qosa sýretshi bolatyn. Sahnaǵa jarqyrap shyǵatyn. Mineziniń ózi qandaı edi! Ashyq minezdi, jarqyn adam bolatyn. Ónerge jarqyrap keldi, jarqyrap ótti, jarqyrap ketti. Onyń urpaǵy, jalǵasy uly barda, súıetin halqy barda, ónerin nasıhattaýshy búgingi jastar barda, onyń óneri eshqashanda óshpeıdi», - dedi QR Mádenıet qaıratkeri, Qazaqstan jastar odaǵy syılyǵynyń laýreaty, ánshi Janar Aıjanova.
Baıqaýda Mádına Eralıevadaı ónerdegi sara jolyn jalǵastyrýdy maqsat tutyp kelgen 11 qatysýshy baq synady. Olar dara tulǵanyń ózine ǵana tán daýsymen aıta almasa da, ánderdi óz múmkindikterine qaraı baryn salyp oryndady. Eki týrdan turǵan baıqaýda úmitkerler «Kúreń kúz» ánin jáne Mádına Eralıevanyń repertýarynan bir ánnen oryndady.
Ádilqazylar alqasynyń sheshimi boıynsha Bas júldeni Júsipbek Elebekov atyndaǵy respýblıkalyq estrada-tsırk kolledjniń stýdenti Raqymjan Maqsatbaev jeńip aldy. І júldeli oryndy da atalmysh kolledjdiń stýdenti Qazbek Ábý ıelendi. ІІ orynǵa Abaı atyndaǵy Qazaq ulttyq pedagogıkalyq ýnıversıtetiniń «Samǵaý» kvarteti laıyqty dep tanylsa, ІІІ oryn J. Elebekov atyndaǵy respýblıkalyq estrada-tsırk kolledjniń stýdenti Erjanat Aqıqatqa buıyrdy. Al, «Mýna» toby erekshe top degen atalymǵa ıe bolsa, «Kórermen kózaıymy» ataǵyna Dinmuhamedáli Sámbet ıe boldy. Barlyq jeńimpazdar dıplomdarmen jáne aqshalaı syılyqtarmen marapattaldy.
Aıta ketelik, qazaqtyń birtýar ánshisi, ónerdi janyndaı súıgen, «Án áleminiń Aqbaıany» atanǵan Qazaqstannyń eńbek sińirgen ártisi Mádına Eralıevanyń ómirden ótkenine bıyl on bes jyl tolyp otyr. Onyń «Aıqaragóz», «Aqbaıan», «Saǵym jyldar» sııaqty áserli ánderi halyq jadynda, júreginde máńgige saqtalyp qaldy.
