Almatyda mádenıet mekemeleriniń jumysyn baqylaıtyn top qurylady
Almaty qalasy ákiminiń orynbasary Erjan Babaqumarov qalanyń bas memlekettik sanıtar dárigeri Jandarbek Bekshın jáne qalalyq mádenıet basqarmasynyń basshysy Ernar Qurmashevpen birlesip, mádenı mekemeler jáne kásiporyn jetekshilerimen kezdesý ótkizdi. Jınalysqa respýblıkalyq jáne qalalyq mádenıet jáne óner nysandarynyń basshylary, sonymen qatar jekemenshik uıym ókilderi qatysty.
Kezdesý barysynda Almaty qalasynda mádenı nysandarynyń jumysyn bastaý máselesi qaraldy. Qazir megapolıste 134 mádenı uıym, olardyń ishinde 41 respýblıkalyq, 40 qalalyq, 6 vedomstvolyq jáne 47 jekemenshik uıym bar. Mádenıet salasynda barlyǵy 8500 adam jumys isteıdi.
Qalalyq mádenıet basqarmasynyń aqparatyna sáıkes, mádenıet nysandary úshin karantın sharalaryn jeńildetýdiń alǵashqy qadamy 2020 jyldyń 25 mamyrynda bastalady. Sol kúnnen bastap bir ýaqytta kelýshiler sany 30 adamnan aspaıtyn, kórermensiz, sanıtarlyq-dezınfektsııalyq tártipti qatań saqtaǵan jaǵdaıda jeke jáne toppen daıyndyq ótkizýge ruqsat etiledi.
Sonymen qatar, mádenıet uıymdary jetekshilerine:
- jumysty qashyqtan isteý múmkin bolsa, qyzmetkerlerdi qashyqtan jumys isteý rejımine aýystyrý;
- kireberis pen shyǵatyn jerge qoldy zalalsyzdandyrý úshin sanıtaızerler ornatý;
- barlyq qyzmetkerlerge bir rettik maskalar men qolǵaptar qoldaný;
- edendi jýý jáne ústelder, sóreler, oryndyqtar, baspaldaq jaqtaýlaryn, esikti kúnine kem degende 3 ret jýyp, tazartyp, 15 mınýt jeldetý;
- aqaýsyz istep turǵan jeldetý júıesimen qamtamsyz etý usynylady.
Kelýshilerdiń sany 50 paıyzdan aspaýy shart.
Buqaralyq mádenı-demalys jáne oıyn-saýyq is-sharalaryn 1 shildege deıin uıymdastyrýǵa tyıym salynady.
Almaty qalasynyń bas sanıtar dárigeri Jandarbek Bekshın mádenıet nysandary basshylaryn barlyq qaýipsizdik sharalaryn qatań saqtaýǵa jáne tıisti sanıtarlyq-epıdemıologııalyq sharalardy júrgizýdiń mańyzdyǵyna nazar aýdarý qajettine toqtaldy. Ásirese mádenıet nysandarynyń jumysyn jańǵyrtýdyń birinshi kezeńi aıasyndaǵy áreketter algorıtmine basa nazar aýdaryldy.
«Murajaılar, galereıalar, kınoteatrlar men basqa da mádenıet nysandaryyń jumysyndaǵy algorıtmde qarastyrylǵan barlyq talaptardy saqtaı otyryp, kúsheıtilgen dezınfektsııalyq rejımdi qamtamasyz etý kerekpiz. Uıymdarda epıdemııaǵa qarsy sharalardyń saqtalýyn – termometrııanyń júrgizilýin, jumys kezinde qolǵap pen maskanyń qoldanylýyn jáne olardyń ýaqtyly aýystyrylýyn, personal arasynda ınstrýktaj ótkizýdi, jýatyn dezınfektsııalyq quraldardyń bolýyn, arnaıy oryndarda jeke tamaqtanýmen qamtamasyz etilýin, jeke gıgıena saqtaý úshin jaǵdaıdyń jasalýyn qadaǵalaıtyn jaýapty adam bolýy kerek. Nysandar jeldetý júıesimen qamtylýy kerek», - dedi J.Bekshın.
Sonymen birge uıymdardyń ákimshilikterine jeke avtokóligi joq qyzmetkerlerdi úılerine jetkizýdi uıymdastyrý tapsyryldy.
Qalanyń mádenıet basqarmasyna joǵaryda atalǵan epıdemıologııalyq talaptar boıynsha nysannyń daıyndyǵyna aldyn ala baǵa berý jóninde monıtorıng tobyn qurý tapsyryldy. Qaýipsizdik sharalary qamtamasyz etilmegen jaǵdaıda nysandarǵa karantın sharalaryna daıyndyǵy týraly akt berilmeıdi.
Qaýipsizdik sharalaryn saqtaýǵa basshylardyń jaýapkershiligi belgilendi.