Almatyda «Mádenı Azıada» baǵdarlamasy aıasynda tanymal qazaqstandyq sýretshi Almagúl Meńlibaevanyń jeke kórmesi ótedi
ALMATY. 25 qańtar. QazAqparat /Názıra Eleýhan/ - Almatyda 7-qysqy Azııa oıyndarynyń «Mádenı Azıada» baǵdarlamasy aıasynda 28 qańtar men 15 aqpan aralyǵynda «Táńiri-Umaı» galereıasynda tanymal qazaqstandyq sýretshi Almagúl Meńlibaevanyń «Saǵan degen meniń Jibek jolym» atty jeke kórmesi ótedi.
Almagúl Meńlibaeva - elimizde suranysqa ıe búgingi zamanǵy sýretshilerdiń biri. Ol kóptegen iri ultaralyq kórmelerge belsendi qatysady. Atap aıtqanda, Italııa, Norvegııa, AQSh, Germanııa, Avstralııa jáne Meksıkadaǵy kórmelerge qatysty. Qazirgi ýaqytta onyń jumystary «XXI-ǵasyr: Birinshi onkúndiktiń óneri» atty ulttyq avstralııalyq Kvınslend kórkem galereıasyna qoıylǵan. Sýretshi bıylǵy jyly Saýd Arabııasyndaǵy Shardj kórmesine qatyspaq. Sonymen qatar, dál osy ýaqyttary onyń jeke kórmesi Nıý-ıork qalasynyń Priska C. Juschka Fine Art galereıasynda ótpek. Búginde onyń jumystary álemniń kóptegen murajaılarynda qoıylǵan, sonymen qatar onyń týyndylary sheteldik jáne otandyq jeke kollektsıonerlerdiń qolynda. Qazir «Tarlan» jáne «Daryn» syılyqtarynyń ıegeri Berlın men Amsterdam qalalarynda turyp, jumys isteıdi. «Qandaı elde júrsem de týǵan jerimdi, Almatyny umytpaımyn», - deıdi sýretshi.
Ónertanýshylardyń aıtýynsha, onyń shyǵarmashylyǵynda ortalyqazııalyq taqyryp basym, ejelgi kóshpendiler mádenıetiniń dástúri kórinis tabady.
