Almatyda «Mádenı Azıada-2011» sharasy aıasynda «Qazaqkontsert - Azıadaǵa» atty mýzykalyq kesh boldy
ALMATY. 31 qańtar. QazAqparat /Názıra Eleýhan/ - Almatydaǵy Qazaqkontsertte «Mádenı Azıada-2011» sharasy aıasynda «Qazaqkontsert - Azıadaǵa» atty mýzykalyq kesh bolyp ótti.
Sharanyń uıymdastyrýshylary - qala ákimdigi men «Qazaqkontsert» AQ.
Kontserttiń ashylý saltanatynda Azııa oıyndarynyń mańyzdylyǵy atap ótilip, aıtýly sharaǵa Qazaqkontsert ónerpazdarynyń da atsalysqany aıtyldy. «Atap aıtar bolsaq, QR halyq ártisi, Memlekettik syılyqtyń ıegeri Roza Rymbaeva, QR eńbek sińirgen ártisi Baǵdat Sámedınova, Búkilodaqtyq baıqaýdyń ıegeri Sembek Jumaǵalıev, taǵy da sol sııaqty basqa da óner sheberlerimiz sporttyq merekege atsalysty. Biz de bul sharany asyǵa kúttik. Búgingi jeńimpazdardy quttyqtaı otyra, aldaǵy básekede jeńisterimiz kóp bolsyn, qorjynymyz altynǵa tola bersin dep tileımin!», -dedi Qazaqstannyń mádenıet qaıratkeri Maral Muhametqalıeva.
Kontsertte Qazaqstan jáne QHR óner sheberleriniń oryndaýynda halyq ánderi shyrqalyp, halyq bıleri oryndaldy. Qazaqkontsert ujymynyń barlyq ánshileri men bıshileri Azıadaǵa aq jol tilep, ánderimen shashý shashty. Kesh QR eńbek sińirgen ártisi Aıjan Nurmaǵambetovanyń oryndaýyndaǵy «Azıada týraly ánmen» aıaqtaldy.
